2. dumengia ordinaria (A) – emprema lecziun

Dieus intervegn ella historia buca directamein, en tutta pumpa. El agescha entras profets, en quei cass Jesaja. Ch’il Segner cloma el gia dal best della mumma fa ch’el ei profet buca mo en sia lavur, mobein en siu esser. Quei vegn per exempel buca detg dils apostels; quels vegnan pri pér ord lur lavur e clamada, p. ex. da pescadur. Il ligiom de Diu cul profet ei en quei cass radicals, sco sch’il profet fuss prius en survetsch da Diu – senza alternativas, mo buca senza siu consentiment. El Veder Testament dat ei zuar è exempels da carstguns destinai ad esser profets mo per in temps – cu il Sogn Spert vegn en moda particulara sur ded els, per ina missiun speciala. Buca cheu el cass de Jesaja. Quei che la lecziun metta en evidenza ei denton che Jesaja ei buca mo destinaus da menar siu pievel anavos tier Diu. Siu clom ei universals: Jesaja duei esser glisch per tuts ils pievels.

Savess ei dar ozildi enzatgei semegliont? Sche Jesaja ei prius ordad in pievel, quel eligiu – tgei pievel e tgei profet savess quei esser oz? Ina religiun? Ni ina baselgia? L’universalitad della missiun indicada per Jesaja sereferescha zuar sin Jesus da Nazareth, mo ei el medem temps escatologica – ella stat sur ils temps, da tschei maun de confessiuns e religiuns e sur quellas. Mo ella ei da l’autra vart tuttina ella historia, el temps, drizzada a carstgauns concrets. Quei ei ina sfida per nies temps, in clom pusseivel pil qual ins duess gizzar las ureglias, ual sco quei ch’il profet Jesaia de Michelangelo en la Cappella Sistina fa.