da sora Armina Maissen
Jeu dun tier che era jeu dubetel mintgaton e giavischel en enqual situaziun ina enzenna dil tschiel. Prendel jeu denton persenn avunda la risposta? Sun jeu buca fixada memia fetg sin quei che jeu less che succedi?
Ei dat bia segns, gie schizun pintgas miraclas en in di, sch’ei reussescha a mi da schar liber mias pretensiuns e crer ch’il Segner tgamuni mia veta. La cardientscha en quei «Immanuel, Dieus cun nus» ei denton la premissa e quella ei mintgaton empau fleivla. Ella sto di per di vegnir renovada. Quei ei nies pensum, nossa missiun: Pertgei di buca Jesus sez tenor Lc 18,8: «Mo il fegl dil carstgaun, anfla quel bein cardientscha sin tiara, cura ch’el vegn?» Lein sespruar cun nossa bunaveglia da buca trumpar il Segner. El ei e vul adina esser cun nus. Quei ei sia empermischun.
Jes 7,10–14
Lezs dis ha il Segner detg ad Ahaz:
Pretenda dil Segner, tiu Diu, in’enzenna; mira giuaden ella profunditad ni viasi ell’altezia! Mo Ahaz rispunda: Jeu pretendel nuot! Jeu vi buca tentar il Segner.
Cheu ha el (Jesaja)Per la buna capientscha cunvegn ei dad era leger la parentesa. detg: Teidla pia, casa da David! Eis ei buc avunda per vus dad unfisar ils carstgauns, che vus unfiseis era miu Diu? Perquei vegn il Segner sez a dar a vus in’enzenna: Uarda! La femna giuvna ha concepiu e vegn a parturir in fegl, ed ella vegn a dar num a quel Immanuel, quei vul dir: Dieus cun nus.
