dad Andri Casanova
Il cudisch da Jesaja presenta cheu ina visiun plein speronza e pasch. En in mund trubistgau, nua che pievels pussents regian a moda autoritara sur dad Israel, annunzia il text la vegnida dil salit. Il mund viva en pasch, solidaritad e giustia.
El cristianissem ei quei text immediat vegnius mess en connex cun la vegnida da Jesus Cristus e dil reginavel da Diu. Era sch’el dat l’impressiun che tut quei ei spir regal, eis ei buca meins impurtont dad s’engaschar egl agen contuorn, per che quella visiun possi serealisar. La pasch e la giustia vul esser tgirada sco ina plonta ch’ei ton sco disfatga e tutta speronza schai sulettamein en sia cuscha.
Jes 11,1–10
Lezs dis vegn ei a daventar:
Ord il best dad IsaiIsai fuva il bab dil retg David cresch’ina frastga,
siadord sia cuscha catscha in cagl;
sin el ruaussa il spért dil Segner:
il spért da sabientscha ed entelgientscha,
il spért dil cussegl e dalla pussonza,
il spért d’enconuschientscha e tema dil Segner.
Siu fladar ei tema dil Segner.
El giudichescha buca tenor la pareta
e sentenziescha buca tenor la tschontscha.
El giudichescha ils paupers tenor giustia,
el fa giustia culs pigns dalla tiara tenor dueivladad;
el marcla il tiran cul bastun da sia bucca
e fa murir il malfatschent cul flad da sias levzas.
La giustia ei la tschenta ch’el ha entuorn veta,
la fideivladad il ligiom da siu schegn.
Il luf seplacca spel tschut,
e sper igl ansiel cauma il panter;
vadi e liun pasculeschan ensemen,
in buobet po dar damogn ad els.
Vacca ed uors fan amicezia,
lur pigns schain in sper l’auter.
Il liun maglia strom sco ils stiarls.
Il pop fa termagls spel lagugn dalla siarp,
il buob stenda siu maun viers il cuvi dalla vipra.
Ins fa ni entiert ni dil mal
sil cuolm da mia sontgezia
pertgei che la tiara ei pleina
d’enconuschientscha dil Segner –
sco quei che las auas empleinan la mar.
Gliez di vegn ei a daventar:
La cuscha d’Isai ei tschentada sco signal pils pievels;
las naziuns sevolvan viers quella,
e sia residenza vegn ad esser gloriusa.
Gliez di vegn il Segner puspei a stender ora siu maun
per liberar il rest da siu pievel
ch’ei vanzaus en Assur ed Egipta,
en Patros, Cusch ed Elam,
da Sinear, Hamat e sillas inslas dalla mar.
