da Marcel Köhle
El secund tschentaner avon Cristus ein biars carstgauns vegni persequitai, perquei ch’els han confessau lur cardientscha gediua ed han praticau quella en lur mintgadi.
Ella lecziun da questa dumengia udin nus in rapport, nua che siat frars e lur mumma vegnan arrestai e nua ch’il retg less sfurzar els da cunterfar a lur perschuasiuns. – Sper l’entira brutalitad da quei marteri dat en egl en quei raquent la cardientscha profunda: ils frars sefidan tuttafatg dallas empermischuns che Diu ha fatg, surtut che El lai buca curdar els ella mort, mobein che El ei quel che schenghegia veta nova ella levada. – Quella perschuasiun dat ad els forza e confiert, era ellas pli stgiras uras da lur veta.
2 Mac 7,1–2.9–14
Lezs dis eis ei capitau che siat frars ein vegni arrestai ensemen cun lur mumma. Il retg leva sfurzar els encunter la lescha da magliar carnpiertg ed ha fatg mislar els cun gheislas e curegias.
Mo in dad els ha priu il plaid en num dils auters ed ha detg: Tgei vul ti dumandar e saver da nus? Nus essan decidi da plitost murir che surpassar las leschas dils perdavons.
Cura ch’il secund steva per dar si il spért, ha el detg: Tiran che ti eis! Ti sclaudas nus da questa veta, mo il retg dil mund vegn a leventar nus a veta perpetna, perquei che nus essan morts per sia lescha.
Suenter quel ei il tierz vegnius tgerlentaus. Cura ch’ei han prentendiu sia lieunga, ha el bein spert stendiu ora quella e tunschiu vi curaschusamein ses mauns. El ha giu la curascha da dir: Dil tschiel hai jeu retschiert quella membra; per amur da sias leschas stemel jeu ella pauc, mo sperel d’obtener ella puspei dad el.
Perfin il retg e quels ch’eran cun el ein stai surstai dalla curascha da quei giuven che fageva stem nuot dallas dolurs.
Suenter che quel ei staus morts, han ei suttamess il quart allas medemas torturas. Mond encunter la fin ha quel detg: Ei vala la peina da murir entras ils carstgauns havend da Diu la speronza da vegnir leventaus entras el. Per tei denton vegn ei a dar negina levada alla veta (perpetna).
