da Flurina Cavegn-Tomaschett
La lecziun tschenta duas caussas el center. Per l’ina quella che tuts carstgauns han avon Diu la medema valur. Mintga carstgaun, schi paupers e pigns sco el sesenta, anfla in’ureglia aviarta tier Diu.
Per l’autra plaida la lecziun dallas unfrendas e metta a cor che Dieus pretenda neginas unfrendas. Avon el ei la sempladad e la sinceradad dil carstgaun impurtonta, buca la grondezia e la custievladad dall’unfrenda. Tgi che stat cun tenuta sincera avon Diu astga esser segirs che sia oraziun penetrescha, sco il fem dall’unfrenda, il nibels ed arriva tier Diu. E Dieus vegn a far stem dad el.
Sir 35,12–14.16–18
Il Segner ei in Diu da giustia,
tier el dat ei buca risguard dalla persuna.
El risguarda buca la persuna en disfavur dil pauper,
el teidla il rugar dil squitschau.
El ignorescha buca il clom digl ierfan
e dalla vieua, sch’ella presenta siu plonsch.
Tgi che survescha (a Diu)Igl ei manegiau il survetsch en-viers Diu, perquei sa era quei en parentesas vegnir legiu. vegn acceptaus,
e siu clom arriva tochen tier ils nibels.
L’oraziun digl humiliteivel penetrescha ils nibels,
ed el anfla buca consolaziun entochen ch’ella ei buca arrivada al final.
El lai buca luc, entochen ch’igl Altissim fa buca stem
e procurescha dretg al gest fagend gesta dertgira.
