da sora Armina Maissen
Quei text plaida per sesez. La sabientscha da Diu survarga tuttas dimensiuns. Il carstgaun sa prestar tgei ch’el vul, da nuot sa el seludar, pertgei tut ei duns regalai dil Spert sogn. Jesus confirma quei egl evangeli tenor sogn Gion: «Separai da mei saveis vus far nuot” (Gn 15,5). Nus savein planisar e calcular, mo nuot ei caussa segira.
Quei sa far a nus sterment, mo sa era quietar. Ei dapenda per tgei che nus sedecidin. Lein sedecider per la fidonza en Diu che meina la finala ora tut en bein, che ha nus aschi zun entamaun che perfin nos cavels sin tgau ein dumbrai dad el (cf. Mt 10,30–31. Quella fidonza fa nus humiliteivels ed ei il cumpass che meina alla veglia da Diu.
Sab 9,13–18b
Tgi dils carstgauns po enconuscher il plan da Diu,
ni tgi po capir tgei ch’il Segner vul?
Las ponderaziuns dils mortals ein gie malsegiras,
e nos plans da pauca valeta;
pertgei il tgierp svaneivel smacca l’olma,
e l’avdonza terrestra grevegia il spért cun bia quitaus.
Mo cun breigia capin nus quei che succeda sin tiara,
e mo cun fadigia anflein nus quei che stat si pil nas;
sche tgi duess lu scuvierer quei ch’ei en tschiel?
Tgi vess duiu enconuscher tiu plan,
sche buca ti vesses dau la sabientscha
e tarmess tiu Spert sogn giu dall’altezia?
Aschia ein las sendas da quels cheu sin tiara daventadas gradas,
ed ils carstgauns han empriu tgei ch’ei plascheivel a ti.
