da Marcel Köhle
«Da quels che sefan da grond drova negin!» – Aschia reageschan biars sch’els entaupan persunas che sefan grondas e lessan star dapertut el center. Era la lecziun da questa dumengia plaida dad esser migeivels e humiliteivels enviers ils concarstgauns. Mo aschia anflan ins la beinvulientscha da tschels (ed era quella da Diu).
Sche nus tschintschein ozildi da humilitonza e «sefar pigns», ha quei savens in tef negativ. Ins patratga cheu a carstgauns che sefan pigns ord pura tema ni che lessan evitar confruntaziuns difficilas. «Sefar pigns» ei savens in sinonim per in tgagiacaultschas!
Mo la lecziun da questa dumengia metta in’autra muntada el center: Nus duein sefar pigns per dar al visavi, al concarstgaun, il spazi dueivel. Cun ina tala tenuta exprimin nus al concarstgaun ch’ins ei aviarts per el. Medemamein muossein nus ad el nossa stema per sia persuna e siu esser. – Migeivladad e sefar pigns ein finalmein in tenuta che duei vegnir veseivla en mintga veta cristiana.
Sir 3,17–18.20.28–29
Miu fegl, seigies migeivels en tias fatschentas,
lu vegns ti carezaus dapli ch’in carstgaun beinvegniu.
Pli gronds che ti eis e pli che ti stos sefar pigns,
lu anflas ti grazia avon il Segner.
Pertgei la pussonza dil Segner ei gronda,
ed el vegn undraus dils humiliteivels.
Per la plaga dil losch dat ei buca remiedi,
en el ha il schliet fatg ragisch.
In cor ch’ei prudents capescha sentenzia,
l’ureglia attenta ei il siemi dil sabi.
