dad Andri Casanova
Ils davos plaids dil cudisch Jesaja miran en in avegnir positiv. Enstagl da smanatschas ei da veser pievels e lungatgs che serimnan tier il Segner. Davostier stat il pievel d’Israel ch’ei dapi in temps turnaus ord igl exil. Quei pievel ha reconstruiu il marcau ed il tempel. Mo pli impurtont ei la reconstrucziun dil pievel da Diu, gie da tut ils carstgauns ed affons da Diu, el survetsch divin. Quei ha ina immensa forza che po scaffir in niev tschiel ed ina nova tiara (cf. Jes 66,22).
Dil reminent: Il pli davos vers dil cudisch Jesaja perda empauet quella tenuta positiva (cf. Jes 66,24). Perquei enconuscha la tradiziun giudaica igl usit da leger suenter quei davos vers aunc inagada il secund davos.
Jes 66,18–21
Aschia plaida il Segner: Jeu enconuschel lur ovras e lur patratgs e vi rimnar tut ils pievels e lungatgs. Els vegnan a vegnir e veser mia gloria. Jeu vi ereger segns en lur miez e tarmetter da lur mitschai tier ils pievels: A Tarsis, Put e Lud, a Moscher e Rosch, a Tumai e Javan, tier las inslas lontanas che han mai udiu notizia da mei ed han buca viu mia gloria. Quels vegnan ad annunziar mia gloria als pievels. Sco unfrenda al Segner vegnan els a far vegnir tut vos frars ordenter ils pievels: A cavagl, sin carrs, sin letgs, sin mels e dromedars – siado sil cuolm da mia sontgezia, Jerusalem. Quei di il Segner. Gest aschia sco quei ch’ils fegls d’Israel portan unfrendas en vischala pura ella casa dil SegnerQuei ei il tempel a Jerusalem.. Ed era ordenter els vi jeu prender per mei sacerdots e levits, di il Segner.
