da Flurina Cavegn-Tomaschett
Tgi che stat el survetsch da Diu ed annunzia sia voluntad, stat savens en prighel da vegnir malcapius e persequitaus. Aschia va ei era cul profet Jeremia che sesanfla en arrest dil retg Zidchija. Tuttina ha el la pusseivladad da plidar tier il pievel ed annunziar ad el igl avegnir che selai buca impedir, sch’els cumbattan vinavon lur inimitgs, ils Caldès.
Jeremia muossa cun ses plaids che decisiuns politicas san era vegnir pridas el horizont dalla cardientscha. Aschi prigulusa sco la situaziun per Jeremia ei, el zuppenta buca sia perschuasiun. Ses adversaris fieran denton el en ina cistiarna.
Gest in Cuschit, pia in jester da pial stgira, salva sia veta e daventa aschia in exempel per nus. Igl exempel muossa che Dieus gida e spendra nus, era entras igl agir da carstgauns.
Jer 38,4–6.8–10
Lezs dis han ils notabels detg siper il retgZidchija: Quei Jeremia sto murir, pertgei el pren la curascha alla schuldada ch’ei restada en quest marcau ed agl entir pievel fagend siper els talas tschontschas. Gie, quei um vul buca la ventira da quest pievel, mobein sia ruina. Il retg Zidchija ha rispundiu: El ei en vos mauns; pertgei il retg ha negina pussonza encunter vus!
Cheu ein els dai a dies a Jeremia ed han fiers el ella cistiarna dil prenci Malchija, situada ella cuort dalla guardia; els han schau giuaden Jeremia cun sugas. Ella cistiarna er’ei buc aua, denton glietta; e Jeremia ei sfundraus ella glietta.
Ussa ei Ebed-MelecEbed-Melec ei in Cuschit e deriva pia da Cusch/Nubia en l’Africa. Quei pievel era da pial stgira. sortius dalla casa dil retg ed ha detg al retg: Miu signur e retg! Quels umens han commess in malfatg entras tut quei ch’els han fatg cul profet Jeremia: Ch’els han fiers el ella cistiarna. Giuaden leu sto el murir dalla fom, pertgei ei dat buc paun pli el marcau. Cheu ha il retg cumandau al Cuschit Ebed-Melec: Pren cheu treis umens cun tei e trai il profet Jeremia siado dalla cistiarna avon ch’el mieri.
