da Ursicin G. G. Derungs
Quella lectura ord il «tierz Jesaja» va suro da legria e da giubel per Jerusalem.
Jerusalem era ius en malencurada per siu Diu pers cul tempel, devastaus, la populaziun deportada 587 a. Cr. dals Babilones. Mo lu il giubel per la liberaziun dalla perschunia 538 a. Cr. grazia a Kyros il Grond, retg della Persia, e la nova scuvretga della grondezia de Diu, buc pli mo lur Diu. Pertgei JHWH, e buca zatgi auter ha clamau Kyros (Jes 41) ed ha aschia revelau sesez sco Diu Signur persuls sur da tuts e tut (Jes 43,11).
Jerusalem stat è per tut quei ch’ei smanatschau e vegn spindrau ord ils stempraus della historia; stempraus che mauncan è oz buc, el temps da pandemias, fomaz ed uiaras. Mo è buc la malencurada per in Diu che resca dad ir a perder ella indifferentadad dellas cunscienzias.
Oz denton lein nus renovar il giubel per la preschientscha de Diu e siu salvament en moda speciala, selegrond cun sur Marcus per siu 50avel onn el ministeri da presbiter della Baselgia, e tedlar il profet: «Selegrei cun Jerusalem, pertgei jeu sun cun vus!» (Jes 41,10).
Jes 66,10–14c
Selegrei cun Jerusalem,
giubilei sur dad el,
vus tuts che veis carezia per el;
selegrei cun el en letezia,
vus tuts che vevas malacurada per el;
perquei che vus saveis beiber en abundonza
dil sein da sia consolaziun,
perquei che vus saveis gustar cun deletg
dil pèz da sia honur.
Pertgei aschia plaida il Segner:
Uarda, jeu vi direger viers el la pasch sco in flum
e la gloria dils pievels sco in dutg sgurghigliont.
Ins porta sin bratsch ses affons,
ballontscha els silla schanuglia.
Sco ina mumma consolescha siu affon,
aschia vi jeu consolar era vus –
a Jerusalem vegnis vus consolai.
Sche vus veseis quei, lu vegn vies cor a selegrar,
e vies tgierp vegn a flurir sco la jarva.
Il maun dil Segner vegn a semanifestar avon ses survients.
