da Marcel Köhle
El Veder Testament dat ei bia passadis che discuoran dalla spetga sil Messias. Il pievel da Diu veva la speronza che Dieus tarmetti ad els ina persunalitad heroica che liberescha els dallas pussonzas jastras che han occupau lur tiara. Mo el text dil profet Saharja sent’ins pauc da quei heroissem. Saharja drova leuencunter il maletg d’in Messias perfurau, in «herox» che pitescha. – Ual en quella descripziun dil Messias vesan ils cristifideivels la profezia da Niessegner che ha pitiu ed ei morts vid la crusch. La mort da quei Messias semuossa tier Saharja sco nova entschatta ella relaziun cun Diu. Ella porta spindrament «per la casa da David e pils avdonts da Jerusalem». – Quei spindrament vesan ils cristians cumplenius ella passiun e mort da Jesus Cristus.
Sa 12,10–11; 13,1
Aschia plaida il Segner:
Jeu derschel or sur la casa da David e sur ils avdonts da Jerusalem in spért da misericordia e commoziun. Lu miran els sin quel ch’els han perfurau. Ed els plonschan per el, sco ins plonscha per in fegl persul; els han malacurada per el, sco ins ha malacurada pigl empremnaschiu. Gliez di sesaulza a Jerusalem in plonsch da malacurada sco il plonsch per Hadad-RimmonIn diu dalla vegetaziun primavauna che vegn deploraus, cu la calira dalla stad fa pirir tut il verd. ella planira da Megiddo.
Gliez di vegn ad esser ina fontauna aviarta per la casa da David e pils avdonts da Jerusalem encunter il puccau e la macla.
