dad Andri Casanova
Schegie che la Trinitad divina ei in element central da nossa cardientscha, anflein nus els texts biblics paucas ponderaziuns leutier. Els dattan buc in clar maletg. Bia stat tschelau. Perquei ein ils emprems concils ella historia dalla Baselgia sefatschentai oravontut cun damondas tier la Trinitad. Ina enconuschientscha centrala ei che Dieus porta en sesez relaziun.
Ella lecziun ord ils Proverbis vegn quella relaziun en Diu illustrada ord l’optica dalla sabientscha da Diu. Quella sabientscha ei en Diu e vegn da Diu. Senza ch’ei vegni tschintschau d’ina Trinitad enconuschein nus cheu enzatgei viv e sgurghigliont en Diu che vul seregalar al carstgaun a moda termaglionta.
Prov 8,22–31
Aschia plaida la sabientschaLa sabientscha da Diu sepresenta cheu sco atgna persuna. da Diu: Il Segner ha scaffiu mei all’entschatta da sias vias, avon sias empremas ovras. Da tutta perpetnadad sun jeu stada formada, dall’entschatta – avon che la tiara daventi. Avon ch’ei detti las profunditads sun jeu vegnida parturida, avon ch’ei detti fontaunas sgurghigliontas. Avon ch’ils cuolms vegnien tschentai, avon las collinas sun jeu naschida. Aunc veva el buca fatg la tiara e las pastiras, avon ch’el fetschi la puorla dil mund. Cu el fermava il firmament er’jeu leu, cu el stabiliva in ur per las auas; cu el pendeva ils nibels sisu, e fixava las fontaunas dalla profunditad; cu el tschentava il tierm alla mar – e las auas han buca innundau las rivas – cu el tschentava ils fundaments dalla tiara, cheu er’jeu sper el sco artista. Jeu erel siu deletg di per di, termagliond avon el tut ils temps. Jeu termagliavel sin la surfatscha dalla tiara e sedelectavel cun ils carstgauns.
