da sur Marcus Flury
Ei mava per la damonda: Duein ils cristians restar ina gruppaziun giudaica, ni sesarver era per buca Gedius. Paulus veva battegiau carstgauns buca giudaics, pia pagauns. Ils cristians che derivavan neu dils Gedius vevan denton manteniu certas isonzas giudaicas sco la surtagliada. Ord quei motiv han els vuliu che tuts cristians setegnien vid las prescripziuns giudaicas. Paulus denton era dil meini che la cardientscha en Cristus ed il Batten tonschien.
Ils cristians neu dalla tradiziun giudaica savevan buca capir ch’ins savessi viver senza lur tradiziuns. Cristians che vegnevan neu dils pagauns savevan buca capir ch’ins duessi daventar Gediu per saver esser cristian. La moda e maniera co ins veva lu encuretg sligiaziuns fuss aunc oz actuala. Quella sligiaziun ei in cumpromiss: Ils pagauns ston buca daventar Gedius per daventar cristians. La cardientscha en Jesus tonscha. Mo els ston risguardar prescripziuns ch’ein zun impurtontas pils Gedius. In’interessanta formulaziun ei: «Il Spert sogn e nus vein concludiu…».
El sogn Spert ch’ei ina forza creativa, astgein nus era en nies temps ver fidonza ed ughegiar pass necessaris per mantener viva la Baselgia.
Fatgs 15,1–2.22–29
Lezs dis ein plirs vegni neuagiu dalla Giudea ed han instruiu ils frars: Sche vus scheis buca surtagliar tenor l’isonza da Moses saveis vus buca vegnir salvai.
Suenter che Paulus e Barnabas han giu ina gronda controversa e dispeta cun els, han ins concludiu che Paulus e Barnabas e zacons dad els mondien si Jerusalem tier ils apostels e vegls pervia da quella questiun.
Ils apostels ed ils vegls cun l’entira cuminonza han concludiu d’eleger umens ord lur miez e tarmetter quels ensemen cun Barnabas e Paulus ad Antiochia, numnadamein Judas, numnaus Barsabas, e Silas, umens sin posts avanzai denter ils frars. Cun quels han ei dau sequent scriver: Ils apostels e vegls, vos frars, salidan ils frars che vegnan neu dils pagauns ad Antiochia, en Siria e Cilicia.
Nus vein udiu che zacons dils nos han caschunau denter vus confusiun e malsegirtad cun lur tschontschas, senza ver incumbensa da nus. Perquei vein nus concludiu unanimamein d’eleger umens e tarmetter tier vus ensemen cun nos cars frars Barnabas e Paulus, umens che han riscau la veta per il num da Niessegner Jesus Christus. Nus vein tarmess Judas e Silas. Els duein relatar a vus il medem a bucca. Pertgei il Spert sogn e nus vein concludiu da buca cargar si a vus auters buordis che quellas caussa necessarias: S’abstener da carn unfrida ad idols, da saung, da carn stinschentada e da pitinem. Sche vus sepertgireis da quei, fageis vus endretg. Stei bein!
