da ser Jan-Andrea Bernhard
Sche jeu legel els Fatgs dils apostels vaiel adina puspei buca mo marveglias, mobein era grond respect. Respect co ils apostels ein stai en per il num da Jesus, v.g. co els ein stai promts da pitir zanur per el, il Salvader dils carstgauns.
Jeu sedamondel: Fussen nus promts dad accentuar visavi nos superiurs politics ed ecclesiastics «Ins sto obedir a Diu dapli che als carstgauns»? Pia che nus mettein Jesus Cristus sco soli criteri per nies far e schar, e dein buca suatientscha sch’ils superiurs ageschan buca tenor la nuviala da Jesus Cristus?
Veramein: Igl ei meglier da schar far ils superiurs sco ei vulan, e dad ir autras vias, las vias da Niessegner, da viver, agir e perdegar en siu num, ed esser perdetga dalla remischun dils puccaus – sebasond sill’empermischun ch’il Spert sogn ei daus a tut quels ch’obedeschan ad el.
In e scadin che va quella via vegn a saver cantar dils fatgs misericordeivels da nies bien Diu, oz ed a semper. Ni sco nus legin el psalm 89 ch’ei tenor ina tradiziun dalla baselgia occidentala la basa pil num e tetel dalla 3. dumengia pascala: «Misericordias Domini in aeternum cantabo».
Fatgs 5.27b–32.40b–41
Lezs dis ha il premsacerdot interrogau ils apostels e detg: Nus vein scumandau rigurusamein a vus d’instruir en quei num, vus denton veis empleniu Jerusalem cun vossa ductrina e leis far vegnir sur da nus il saung da quei carstgaun.
Pieder ed ils apostels han rispundiu: Ins sto obedir a Diu dapli che als carstgauns. Il Diu da nos perdavos ha leventau Jesus che vus veis pendiu vid il lenn e mazzau. Dieus ha alzau el per regent e Salvader da sia vart dretga, per dar ad Israel conversiun e remischun dils puccaus. Perdetga da quels fatgs essan nus ed il Spert sogn, il qual Dieus ha dau a tut quels che obedeschan ad el.
Cheu han ei scumandau als apostels da perdegar en num da Jesus e dau liber els. Els denton ein i naven dil Cussegl plein legria d’esser stai vengonzs da pitir zanur per siu num.
