da sur Martin Bearth
Moses, in Israelit, salvaus ord l’aua entras la feglia dil farao ed educaus da quella, ei vivius biars onns sco fugitiv. El veva priu partida per siu pievel israelitic e sturniu in Egipzian che maltractava in sclav israelitic. E lu fuva el sez en prighel da veta ed era fugius, lunsch naven agl ur dil desiert. Suenter biars onns ei Dieus cumparius leu ad el en in spinatsch ardent. Ed el ha survegniu da Diu il camond da turnar ell’Epigta e liberar dalla sclaveria siu pievel. Moses ha vuliu saver il num da Diu ed ha retschiert la risposta: «Jeu sun Jahve, il Diu da tes perdavons.» Jahve san ins translatar cun ils plaids «Jeu sun quel che jeu sun» ni era «Jeu sun cheu». Jeu sun cheu en tut e dapertut, jeu sun era cun tei oz e damaun ed adina.
Ex 3,1–8a.13–15
Lezs dis pertgirava Moses las nuorsas da siu sir Jitro, il sacerdot dils Midianits. Inaga ha el catschau las nuorsas sur ils cunfins dalla pastira ora ed ei vegnius tier il cuolm da Diu, Horeb. Ed igl aunghel dil Segner ei cumparius ad el en ina flomma da fiug ord in spinatsch. E cu el ha mirau, uarda, il spinatsch ardeva el fiug, mo il spinatsch vegneva buca consumaus.
Cheu patratga Moses: Jeu vi ir vitier e mirar quella marvegliusa appariziun, pertgei ch’il spinatsch brischa buc. Ed il Segner ha viu ch’el vegneva neutier per mirar. E Dieus cloma el ord il spinatsch: Moses! Moses! El rispunda: Cheu sun jeu. E Dieus di: Neu buca neutier! Trai ora ils calzers da tes peis; pertgei il liug, nua che ti stas, ei terren sogn. Lu di el: Jeu sun il Diu da tiu bab, il Diu d’Abraham, il Diu d’Isac ed il Diu da Jacob. Cheu cuviera Moses sia fatscha; pertgei el veva tema da mirar en fatscha a Diu.
Ed il Segner di: Jeu hai fatg persenn dalla miseria da miu pievel ell’Egipta ed hai udiu siu selamentar pervia da ses murtiraders. Gie, jeu enconuschel lur suffrientschas. Perquei sun jeu descendius per spindrar els dils mauns dils Egipzians e per menar els ord quella tiara en ina tiara biala e vasta, ina tiara che fluescha da latg e mèl.
Cheu di Moses a Diu: Mira, sche jeu vegn ussa tier ils Israelits e ditgel ad els: Il Diu da vos babs ha tarmess mei tier vus, – e sch’els damondan lu: Co ha el num? tgei duei jeu lu rispunder ad els? Cheu di Dieus a Moses: Jeu sun quel che jeu sun. Ed el continuescha: Aschia dueis ti dir als Israelits: Il Jeu-Sun ha tarmess mei tier vus. E plinavon di Dieus a Moses: Aschia dueis ti dir als Israelits: Jahvetenor tradiziun giudaica vegn quei num buc pronunziaus, enstagl san ins dir «il Segner», il Diu da vos babs, il Diu d’Abraham, il Diu d’Isac ed il Diu da Jacob ha tarmess mei tier vus. Quei ei miu num a semper, ed aschia vi jeu esser aduraus da schlatta en schlatta.
