da sur Alfred Cavelti
La Cureisma envida nus da semetter sapientivamein e cun niev anim sin via cun Diu e profundar la relaziun cun el. Igl esser sin via ei in patratg biblic. Il text dalla lecziun per l’emprema dumengia regorda agl esser sin via dil pievel d’Israel, ord la sclavaria dils Egipzians siado ella tiara, nua che «latg e mèl flueschan». Igl ei in confess a quei Diu che ha «menau cun maun ferm e bratsch stendiu» ils ses en in bien avegnir. Moses appellescha da purtar persuenter al Segner veneraziun ed engraziament cun surdar ad el «fretgs dalla tiara nova».
La Cureisma, gie nossa veta, ei in esser sin via. Dieus meina nus ed el ei la finamira da nies viadi. Nus astgein ir cun fidonza nossa via e sespruar da purtar «buns fretgs» ad el sco segn da nossa veneraziun e nies engraziament. Ed alla fin da nies viadi spetga la tiara nova sin nus. Pastgas, la fiasta dil spindrament e dalla veta, arva a nus ina fessa dalla porta en quella realitad da ventira cumpleina.
Dtn 26,4–10
Moses ha plidau cul pievel e detg:
Il sacerdot duei prender il canaster cun ils fretgs primizials orda maun a ti e tschentar el avon igl altar dil Segner tiu Diu. Mo ti confessa e plaida avon il Segner tiu Diu: Miu bab ei staus in Aramè giront. El ei descendius giu ell’Egipta ed ei vivius leu sco jester cun fetg pintga suita. Mo leu eis el daventaus in pievel grond, pussent e numerus. Ils Egipzians denton han maltractau e squitschau nus e cargau sin nus greva lavur da tribut. Cheu vein nus griu tier il Segner, il Diu da nos perdavons. Il Segner ha udiu nies clamar e viu nossa miseria, nossa stenta e nossa oppressiun. Ed il Segner ha menau nus cun maun ferm e bratsch stendiu ord Egipta, derasond grond sterment e fagend miraclas ed enzennas. El ha menau nus en quest liug e dau a nus questa tiara, ina tiara, nua che latg e mèl flueschan.
Mo ussa uarda, jeu portel a ti ils emprems fretgs dalla tiara che ti, Segner, has dau a mi. E lu depona quels avon il Segner tiu Diu e sefiera per plaun avon il Segner tiu Diu.
