dad Ursicin G. G. Derungs
Ei dat da far bia scheltas ella veta, pli u meins impurtontas. Denton dat ei scheltas fundamentalas: ina l’orientaziun viers il bien, quei ch’ei gest, la giustia en sias fuormas variontas; e l’autra, che sclauda buca l’orientaziun viers igl engon, viers quei ch’ei buca gest.
Ina varianta de quei schema, en fuorma fetg radicala, vein nus ella lectura dil profet Jeremia. Quel entscheiva cul carstgaun pervers. Pil profet eis ei quel che selai sin carstgauns e metta buc sia fidonza en Diu. Il cuntrari stat ei cun quel che selai sin Diu e tschenta sin el sia speronza. Quellas duas scheltas vegnan illustradas cun maletgs della Palestina: il pervers ei sco in spinatsch senza feglia el desiert; cheu dat ei nuot auter che sablun e tiara salmastra. Il maletg per quel che selai sin Diu ei il pumer che crescha sper l’aua, zatgei grondius el context d’in desiert.
Tgi che legia quellas pèr lingias, duess ual è leger psalm 1 dil psalteri, quel dellas «duas vias» che drova ils medems maletgs, per quel ch’elegia bein sia via, e per quel che va vias piarsas.
Nossa damonda ei: Sin tgei seschein nus, la finala? Tgei fontaunas spiritualas vein nus? Ed essan nus pertscharts de quei ch’ei ozildi desiert entuorn nus?
Jer 17,5–8
Aschia plaida il Segner:
Smaledius igl um che selai sin carstgauns,
che drova per bratsch sia fleivla carn,
ferton che siu cor untgescha dil Segner.
El semeglia ina caglia amiez il desiert,
e vegn a veser nuotzun dil bien.
El vegn a star ella tiara burnida dil desiert,
en tiara schitgira da sal.
Benedius igl um che sefida dil Segner,
che tschenta sil Segner sia speronza!
El ei sco in pumer plantaus sper uals dad aua,
che catscha ragischs encunter il dutg.
El sto ca temer il cauld dil sulegl,
sia feglia piarda buca il verd.
Er igl onn schitgira stermenta buc el,
el cala mai da purtar fretg.
