dad Andri Casanova
Il cudisch Nehemia descriva ina zun festiva moda da preleger la Sontga Scartira. Esra prelegia ord il cudisch dil tschentament. Quei ei la Tora, pia ils schinumnai tschun cudischs da Moses. Quels han per ils Gedius ina semeglionta muntada sco per nus ils evangelis.
Ei era il temps suenter igl exil babilonic, in temps ch’il pievel d’Israel stueva encurir ina nova entschatta ed ina nova identitad. Quella han els anflau ella Sontga Scartira, el plaid da Diu.
Enteifer la lecziun fa la reacziun dil pievel surstar. Els bragian ed ein trests. Ins sa buca daco. Ein els forsa daventai cunscients che lur cuminonza satisfetschi buc a quei che la Tora presenta? Han els viu las differenzas socialas denter pauper e reh? Ein els s’encorschi che lur cuminonza era buca unita e ch’ils jasters vegnevan sclaus? – E tgei evochescha la Sontga Scartira oz tier mei?
Ne 8,2-4a.5-6.8-10
Lezs dis ha il sacerdot Esra purtau il cudisch dil tschentament avon la raspada, avon umens e dunnauns, avon tut quels che savevan tschaffar el, igl emprem di dil siatavel meins. Dalla damaun marvegl entochen miezdi ha el legiu orda quel silla plazza avon la Porta d’aua en preschientscha dad umens e dunnauns, insumma da tut quels che savevan capir el, e l’attenziun da tut il pievel era drizzada sil cudisch dil tschentament. Il doctur dalla lescha Esra steva sin in’aulta scantschala da lenn ch’ins veva erigiu per quella caschun.
Ed Esra ha aviert il cudisch avon ils egls da tut il pievel; el steva numnadamein pli ault che tut il pievel. E cu el ha aviert il cudisch, ei tut il pievel sesalzaus. Sinquei ha Esra glorificau il Segner, il Diu maiestus. E tut il pievel ha rispundiu culs mauns ad ault: Amen! Amen!amen munta «pilver» Lu ein els sefiers giu ed han sbassau lur fatscha avon il Segner tocca plaun. Ed ins ha prelegiu or dil cudisch dil tschentament da Diu toc per toc e declarau ei, aschia che la glieud fageva adatg sin quei che vegneva prelegiu.
Ed il guvernatur Nehemia ed il sacerdot Esra, il doctur dalla lescha, ed ils levits ch’instruevan il pievel han plidau cun els tuts: Quest di ei sogns al Segner vies Diu. Buca secontristei e buca bargi! Tut il pievel bargeva numnadamein, udend ils plaids dil tschentament. Perquei ha el detg ad els: Mei e serecreei cun vivonda gustusa e bubronda dultscha e tarmettei da quei era a quels che han nuot; pertgei quest di ei sogns a nies Signur. Buca seigies trests! Selegrei en il Segner! Quel ei voss’ustonza.
