da Maria Cristina Derungs-Bartolomei
La tendenza e la resca de negligir e bandunar ils vegls ei stada adina presenta – perquei las admoniziuns digl autur biblic ca. 200 onns a.Cr. Quellas punctueschan enzatgei ch’ins emblida bugen: Nossa existenza e tut quei che nus essan dependa da quei che nos geniturs han dau a nus. E da numerus auters ch’ein stai ed ein «babs e mummas» (scolasts, spirituals, persunas ch’han tgirau nus ni dau impuls culturals, amitgs, fargliuns, parents) per nossa persuna e veta.
Quei va encunter l’ideologia arroganta e autosufficienta de quels che seglorieschan ded esser «self-made-man», de saver grau a negin; tenor il maletg dominont d’in «subject» carschiu, saun, occidental, beinstont, da schlatteina masculina.
Attenziun e respect per ils vegls van denton ensemen cul respect per tut ils fleivels e senza pussonza della famiglia humana: ils pigns, paupers, malsauns, impedi, migronts, giuvens, las dunnas. Quella tenuta secumprova sco verdeivla sch’ella entscheiva ella famiglia ni cuminonza ella quala ins viva, sco la lecziun di: cun respectar il bab ed undrar la mumma.
Schiglioc sa ella esser mo ina fuigia en ina retorica vita.
Sir 3,2–6.12–14
Il Segner ha dau honur al bab avon ils affons
e francau la pussonza dalla mumma avon la figlialonza.
Quel che respecta il bab expiescha ils puccaus,
e quel che honorescha sia mumma ei sco in che rimna scazis.
Quel che respecta il bab vegn a ver plascher dils agens affons,
e cu el fa oraziun vegn el a vegnir exudius.
Quel che fa honur al bab vegn a contonscher aulta vegliadetgna,
ed al Segner obedescha tgi che fa plascher a sia mumma.
Affons, seigies in sustegn per tiu bab ella vegliadetgna,
e cuntristescha buc el duront sia veta.
Era sche siu intelletg vegn dils meins, hagies capientscha,
e buca sprezza el, sche ti eis plein forza.
Il bien fatgs al bab vegn mai emblidaus,
per expiaziun dils puccaus vegn ei mess a quen a ti.
☛ evangeli dalla dumengia: Lc 2,22–40
