dad Andri Casanova
Il cudisch Baruh ei in cudisch dalla speronza. El ha avon egl la situaziun dil pievel giudaic bandischaus egl exil. Tschentaners avon ch’il text ei vegnius nudaus, ein grondas parts dil pievel giudaic numnadamein vegnidas deportadas ella regiun da Babel. Quei eveniment ei d’eminenta muntada per ils Gedius, mo era per nus cristians. Pertgei el fa sefatschentar nus cun nossa atgna identitad e provochescha la damonda: Nua ei nies dacasa?
La lecziun dad oz presenta ils davos vers dil cudisch. Els ein screts en fuorma d’in psalm e sedrezzan a Jerusalem. Igl ei la situaziun ch’ils bandischai astgan turnar anavos a Jerusalem, pia a casa. Quei ei in mument da pleina legria. Dieus vul menar els a casa, alla glisch da sia gloria. Quei patratg repren lu era la Palentada en ses davos capetels (mira Pal 21,10–22,5).
Il real retuorn ord igl exil ei pia ferm segn da speronza per nossa veta. Cuolms e vals vegnan planivas sin nossa via viers il marcau etern.
Bar 5,1-9
Jerusalem, trai o il vestgiu da cordoli e da tia miseria,
trai en per adina il vestgiu festiv dalla gloria da Diu.
Pren sur schui il manti dalla giustia divina,
metta sin tgau la cruna dalla gloria digl Etern.
Dieus vul gie mussar tia splendur dapertut sut il tschiel.
Ti vegns a senumnar davart da Diu en perpeten:
Pasch da giustia, gloria dalla tema da Diu!
JerusalemJerusalem astga selegrar sco ina mumma dil retuorn das ses affons ord igl exil, stai en pei e seposta sigl ault,
uarda viers gl’Orient e mira leu tes affons
rimnai per ordra dil Sogn dil Vest toch’igl Ost,
els ein plein legria, perquei che Dieus ei seregurdaus.
A pei eran els i naven da tei, catschai digl inimitg,
mo Dieus meina els anavos tier tei,
els vegnan purtai en gloria sco affons d’in retg.
Dieus ha decidiu da sbassar
mintga crest pli ault ed ils cuolms eternals
ed emplenir las vals che la tiara vegni planiva,
sinaquei che Israel sappi marschar
segiramein ella gloria da Diu.
Ils uauls e tut las plontas d’odur
dattan per ordra da Diu umbriva ad Israel.
Pertgei Dieus vul menar Israel
cun legria alla glisch da sia gloria,
purschend ad els sia misericordia e sia giustia.
