da Flurina Cavegn-Tomaschett
La lecziun dil di sereferescha alla situaziun suenter la devastaziun dil reginavel dil sid Juda. Quella era succedida alla fin dil 6. tsch. a. Cr. entras ils babilons. Era il marcau da Jerusalem era vegnius destruius. Ils anteriurs retgs vevan disdiu ed eran responsabels per quella catastrofa. En quei temps crescha il desideri dil pievel per in bien e gest retg, in ord la casa da David. Il profet Jeremia porta, sco vusch da Diu, plaids che portan confiert e curascha: Dieus empermetta in niev retg, il Messias.
Quella lecziun che stat all’entschatta digl advent lai era sperar nus sin la vegnida dil Messias che porta giustia e segirtad.
Jer 33,14–16
Uarda, dis vegnan a vegnir – sentenzia dil Segner – che jeu fetschel ir en vigur l’empermischun pronunziada sur la casa d’Israel e sur la casa da Juda. En lezs dis ed en gliez temps vi jeu far nescher a David in descendent da giustia. E quel vegn a procurar per dretg e giustia ella tiara.
Lezs dis vegn Juda ad anflar salit. Jerusalem ad avdar en segirezia, e quei ei il num ch’ins vegn a dar al marcau: Il Segner, nossa giustia!
