da ser Jan-Andrea Bernhard
Igl apiestel Paulus scriva en sia brev als Romans: «Pertgei en spronza essan nus vegn spindrai» (cf. Ro 8,24). – La spronza semuossa en quels plaids buca sc’ina caussa nunrealistica, mobein sc’ina caussa che sebasa sin experientschas fundamentalas, ord las qualas nossa cardientscha ei carschida.
Ella lecziun da quella dumengia udin nus dad ina visiun nocturna, numnadamein ch’il «fegl da carstgaun», nies Salvader, vegni in gi puspei a cumparer – sco nus plidein mintga dumengia: «Segner, nus annunziein tia mort e confessein tia levada entochen che ti tuornas en gliergia.»
Quei schabetg ha la visiun da Daniel en vesta! La visiun da Daniel fa attents nus silla realitad che nies mintgagi ei buca il sulet criteri per la veta d’in cristian. «Cheu havein nus gie buc in liug statteivel, mobein encurin quel che ha da vegnir» (Heb 13,14).
Sco buobet vai jeu tedlau onns ora ed onns en ella scola da dumengia («Sonntagsschule») cun grond plascher ch’il «fegl da carstgaun» vegni a returnar. Oz saiel che la visiun da Daniel ei la basa fundamentala da mia cardientscha. Cun buna spronza spetgel aunc in mumenet.
Dan 7, 13–14
Jeu hai viu en la visiun nocturna:
Uarda! Sils nibels dil tschielen ina sfera divina
cumpara in sco in fegl da carstgaun«fegl da car-stgaun» ei ina ve¬glia expressiun per il messias, pli tard vegn l’ex-pressiun duvrada per Jesus Cristus.
Quel s’avonza tochen avon il vegliuord
e vegn menaus avon lez.
Ad el vegn surdau pussonza,
dignitad e domini.
Mintga pievel, naziun
e lungatg survescha ad el.
Sia pussonza ei pussonza perpetna
che maina va da rendiu;
siu domini ei domini etern
che vegn maina cassaus.
