da sur Martin Bearth
Las scartiras dil Veder Testament damondan oravontut suenter quei che daventa duront la veta terrestra. Tgei che daventa suenter quella veta, vegn mo darar en damonda. Ins spetga il salit da Diu sin quest mund.
Mo tgei daventa cun quels che ston pitir malgestamein? Ei lur speronza vana? Co stat ei lu cun la giustia e la pussonza da Diu? Il cudisch Daniel, screts ca. 160 a. Cr., plaida clar e bein d’ina levada dils morts. Ils carstgauns ch’ein i la via gesta e han giu da pitir sin tiara, vegnan pri per adina ella cuminonza cun Diu. El fa dertgira gesta.
Quei ei era nossa speronza cristiana. Dieus vul buca nossa mort. El careza nus e nossa veta. A tut quels ch’enqueran el, regala el veta e cuminonza perpetna. Il garant persuenter ei Jesus Cristus.
Dan 12,1–3
Da gliez temps sesaulza Mihaelarzaunghel, il grond prenci che veglia sur ils fegls da tiu pievel; ed ei vegn ad esser in temps da tribulaziun, sco quei ch’igl ei maina stau dapi ch’il pievel exista. En quei temps vegn tiu pievel salvaus, scadin ch’ins anfla nudaus ella rolla. Biars da quels che dierman gia ella tiara vegnan a vegnir neunavon, quels per la veta perpetna, tschels per la sgarschur perpetna. Ils sabis vegnan a tarlischar sco la splendur dil firmament, e sco las steilas quels che han menau biars tier la giustia – per tutta perpetnadad.
