da Mariano Tschuor
Pertgei vegn endamen a mi – legend quei text ord il VT – la samaritana sper la fontauna (Gn 4,5–26), mo era la dunna Abigail ord il cudisch da Samuel, Maria da Magdala, Maria e Marta e buc’il davos Maria, la mumma da Jesus? Tontas dunnas, ual el VT, veras acturas, buc statistas, el plan da Diu cun siu pievel.
Las inas fan quei che vegn detg da far, buca submissivamein han ins l’impressiun, mobein en e cun cardientscha. Las autras ageschan cun in art ch’ei daus – senza malart – allas dunnas: la malezia. Patertgeien vid Rut, mo era Sara e Hagar. E dad Abigail vegn ei scret: «Igl um veva num Nabal, sia dunna Abigail. La dunna er’intelligenta, perderta e biala. Igl um encuntercomi in rubiesti e nausch, el er’in calabiter» (1 Sam 25,3). Intelligenta e biala! Con bein fagess ei a nossa baselgia dad oz dad arver finalmein las portas e schar entrar las dunnas tochen sissum en uffecis e hierarchias.
Ni vein nus tema, che frina ed ieli vegnessan da meins?
1 Re 17,10–16
Lez dis ei il profet Eliamuntada dil num: JHWH ei Dieus sefatgs si ed ius a Sarepta. Cu el ei arrivaus avon la porta dil marcau, uarda, leu era gest ina vieua ch’encureva lenna. El plidenta ella e di: Va per in cup aua per mei, che jeu sappi beiber. Duront ch’ella va persuenter, cloma el suenter ad ella: Porta era in toc paun per mei! Mo ella rispunda: Schi franc ch’il Segner tiu Diu viva, jeu hai negin paun, sulet ina braunca frina el briec ed empau ieli el cup. Uss enquerel jeu cheu in pèr sterps, e lu mon jeu a casa e cuschinel per mei e miu fegl, e cu nus vein magliau, stuein nus bein ni mal murir.
Elia di ad ella: Seigies senza quitau! Va a casa e fai, sco ti has detg. Mo fai igl emprem per mei in paunet e porta ora quel a mi; per tei e tiu fegl sas ti lu suenter far enzatgei. Pertgei aschia di il Segner, il Diu d’Israel:
La frina el briec duei buca vegnir dil meins,
ed igl ieli buca schigiar el cup,
entochen quei di ch’il Segner lai plover sin tiara.
Ed ella ei ida ed ha fatg sco Elia veva detg; ed els han giu da magliar di per di, ella ed el ed il mat. La frina el briec ei maina vegnida dil meins, ed igl ieli el cup ei buca schetgs vi tenor il plaid ch’il Segner veva plidau tras Elia.
