da sur Alfred Cavelti
Il Spert da Diu tschaffa e mobilisescha adina puspei carstgauns el decuors dalla historia dil salit. Ed el operescha leu nua ch’el vul. El selai buca canalisar ed ei buca reservaus mo sin certins. Quei fa il passus ord il quart Cudisch da Moses clar. Buca mo ils siatonta «vegls» vegnan tschaffai dil Spert dil Segner. Era dus ch’eran buca en lur ravugl, retscheivan il medem dun. Pertgei Dieus ei libers da dar siu spért a quels ch’el elegia.
La reacziun da Josua: Quei astga buc esser. Il spért ei daus mo a quels ch’ei serimnai ella sontga tenda.
Mo Moses ei d’in’autra perschuasiun. El ei cunscients ch’il Spert da Diu operescha leu ed aschia sco el vul. El ei buca reservaus mo ad ina sparta dils cartents. Perquei sia risposta: Sche mo il Segner tschentass siu spért sigl entir pievel!
Num 11,25–29
Lez dis ei il Segner descendius ella nebla giu tier Moses ed ha plidau cun lez. Ed el ha priu dil spért che era staus daus a Moses ed ha tschentau quel sils siatontaquella cefra munta cumpleinadad vegls. Cu il spért ei vegnius sur dad els, ein els curdai en extasa senza calar.
Mo dus umens eran restai anavos el camp. In da quels veva num Eldad, l’auter Modad. Era sur da quels ei il spért vegnius, pertgei els eran denter ils eligi, mo eran buca i tier la sontga tenda.
Cheu ei in mat currius ed ha avisau Moses: Eldad e Modad ein curdai en extasa el camp. E Josua, il fegl da Nun, che era da giuven ensi staus il survient da Moses, ha priu il plaid e detg: Moses, miu signur! Fai calar els!
Mo Moses ha detg ad el: Seprendas ti en pervia da mei? Sche mo il Segner fagess ord igl entir pievel profets! Sche il Segner tschentass siu spért sin els!
