da ser Jan-Andrea Bernhard
Tgi ha buca gia giu la visiun che tut ils tschocs, ils méts, ils suords ed ils schirai vegnien medegai? Gie, ch’ei astgien esser pertscharts che las empermischuns da Diu seigien buca plaids senza effect? – Sco buobet vaiel adina cartiu vid tals plaids da nies bien Deus, senza ver dubis. Sco student vai jeu empriu il context da tut quels plaids ed empermischuns dil Veder Testament. Ed oz? Oz sundel predicant e sedamondel naturalmein e regularmein co ch’ei stetti cun tals plaids…
Avon cuort vai jeu dumandau mes scolars dalla superiura: Vid tgei carteis Vus? Ei havessen stuiu scriver sin in fegl – ina scolara denton ha getg senza vegnir dumandada, plein spért: «Jeu creigiel che nus vein in Diu che mira sin nus, consolescha nus e medeghescha nus!» – Jeu sundel staus plats. Cheu enquerel jeu plaids e formulaziuns co che quellas visiuns (p.ex. da Jesaja) seigien da capir, ed ina scolara gi a mi en moda e maniera sempla: Ti stos crer, lu daventa ei schon realitad! Jeu saiel: Buca tuts giuvens – ed era buca tut ils vegls – patratgan aschia, denton ein talas experientschas per nus tuts la basa profunda da sefidar adina danovamein dallas empermischuns da nies bien Deus.
Jes 35,4–7a
Schei a quels d’in cor embrugliau:
Veies curascha e buca temei!
Cheu ei vies Diu!
La vendetga arriva, la pagaglia da Diu.
El sez arriva per dar a vus spindrament.
Ils egls dils tschocs daventan lu clars,
las ureglias dils suords sesarvan.
Lu vegn il schirau a siglir sco il tschierv,
la lieunga dil mét vegn a cantar,
pertgei el desiert sgarguglian fontaunas,
e dutgs ella cuntrada senz’aua.
Il terren sechentau daventa in puoz,
la tiara da seit semid’en fontaunas dad aua.
