da sur Martin Bearth
Igl artist tudestg El Shalom Wieberneit ha scaffiu in maletg meditativ sur dils diesch camondaments da Diu: Siado d’ina fontauna sesaulza ina caglia; ella porta ils diesch camondaments da Diu ed ordlunder crescha ina gronda plonta che porta da tuttas sorts fretgs.
«Ils tschantaments ed uordens da Diu» vulan regalar a nus liberaziun da ligioms e dependenzas da nossa veta, directiva sin nies viadi, pasch e ruaus, la sabientscha e la carezia da Diu. E nies viver sin tiara daventa plaun a plaun sco ina plonta che porta da tuttas sorts fretgs, e vonzei vegnin nus lu a «posseder la tiara ch’il Segner vul dar a nus».
Dtn 4,1–2.6–8
Moses ha plidau cul pievel e detg: Ed ussa, Israel, teidla ils tschentaments ed uordens che jeu vi mussar a vus d’observar, per che vus resteies en veta e vegnîes a posseder la tiara ch’il Segner, il Diu da vos perdavons, vul dar a vus. Da quei che jeu camondel a vus, dueis vus ni metter vitier ni prender naven enzatgei, mo observei ils camonds dil Segner vies Diu che jeu dun a vus.
Observei e salvei els pia! En quei consista gie vossa sabientscha e vossa entelgientscha els egls dils pievels. Sche quels audan da tut quels tschentaments, vegnan els a confessar: Tgei pievel sabi e prudent ei questa gronda naziun! Nua ei aunc in grond pievel che ha in Diu che stat aschi datier ad el sco a nus il Segner nies Diu, schi savens che nus implorein el. E nua ei aunc in grond pievel che ha tschentaments ed uordens aschi gests sco tut questa lescha che jeu suttamettel oz a vus?
