da sur Martin Bearth
In losch ceder! El stat egl uoppen dil retg David e siu reginavel. Mo era quei losch reginavel ei rumpeivels. El ha rut la ligia cun Diu ed ei sefidaus sulettamein da sesez. La consequenza ei stada igl exil a Babel.
Mo cheu vegn il Segner cun la buna nova dil salvament. El sez rumpa giu dil spitg dil ceder in’enfiarla e plonta quella danovamein sil Sion, sigl ault cuolm d’Israel. Aschi pintga ei la nov’entschatta che Dieus fa e schi gronda ei la nova plonta. Dieus sbassa ils loschs ed aulza ils humiliteivels sco ei stat scret el magnificat. Quella via ei era il Cristus ius, naven dil pursepen a Betlehem tochen vid la crusch dil Calvari. Quei ei la via che ha menau el allas Pastgas, ed era nus.
Ez 17,22–24
Aschia plaida Dieus il Segner:
Jeu vi prender dil spitg dil cederIl ceder, ina plonta da guilas che crescha ora-vontut el Liba-non, vala sco la tipica plonta divina.,
giu da sum sias frastgas vi jeu rumper in’enfiarla,
e jeu mez vi plantar ella sin in ault ed imposant cuolm.
Sigl ault cuolm d’Israel vi jeu plantar ella.
Ella vegn a catschar frastgas e purtar fretg
e daventar in ceder magnific.
Sut quel vegnan tut ils utschals a setschentar,
tut l’utschleglia vegn a serimnar ell’umbriva da sia roma.
E tut las plontas dalla campagna vegnan ad enconuscher,
che jeu, il Segner,
hai sbassau la plonta ch’ei gronda
e fatg gronda la plonta ch’ei bassa,
che jeu hai fatg seccar la plonta verdegonta
e verdegar la plonta secca.
Jeu, il Segner, hai plidau
e vegnel a far ir en vigur.
