dad Ursicin G. G. Derungs
Car* lectur*, legia igl entir capetel 10 dils Fatgs dils apostels. Igl ei la historia dil pietus capitani roman Cornelius e co el ei vegnius battegiaus da Pieder. La Giudea era gia da decennis occupada dals Romans, e Cornelius cumandava la garnischun romana a Cesarea.
Lucas raquenta ch’el, in pagaun ed um gest, survegn part dil sogn Spert, e che Quel fa pér lu clamar Pieder ch’ei a Joppe. Pieder vegn pia informaus e clamaus cu Cornelius era gia convertius. Il sogn Spert ha agiu ordavon, sin terren pagaun, mo siu agir vegn sigillaus dal batten de Pieder (la baselgia). Lucas vul metter en buna glisch ils Romans (mira è Lc 7,3–5) e lur relaziun cun la giuvna baselgia, e dat a quei in fundament teologic cun mussar l’«autonomia» dil sogn Spert el capitani Cornelius.
Pieder ha stuiu explicar quei als con-cartents d’origin gediu (Fatgs 11,1–18) che tertgavan che tut – era il dun dil sogn Spert – hagi dad ir la via ufficiala gediua-ecclesiala. El sez sto confessar: «En verdad, ussa capeschel jeu che Dieus mira buca silla persuna. En mintga pievel ei quel che ha tema da Diu e pratichescha giustia beinvegnius ad El» (10,34-35). In grond plaid! E lu da tener endamen la bellezia della tensiun viva denter il sogn Spert de Jesus levaus da mort en veta che agescha denter pagauns e la cardientscha della cuminonza cul sacrament dil batten.
Fatgs 10,25–26.34–35.44–48
Lez dis ei Pieder arrivaus a Ceserea. Cheu ei Corneliusin capitani gest e pietus che veva fatg clamar Pieder ius encunter ad el, ei semess avon ses peis ed ha adurau el. Mo Pieder ha alzau en pei el e detg: Stai si! Era jeu sun mo in carstgaun. Ussa ha Pieder priu il plaid e detg: En verdad, ussa capeschel jeu che Dieus mira buca silla persuna, mobein ch’en mintga pievel ei beinvegnius ad el tgi che ha tema dad el e pratichescha giustia. Aunc duront che Pieder plidava aschia, ei il Spert sogn vegnius giu sur da tut quels che tedlavan il plaid. Ils Gedius cartents ch’eran vegni cun Pieder sesmarvegliavan zun fetg, ch’il dun dil Spert sogn fuva derschius era sin ils pagaunspia sin quels che fuvan sco Cornelius buca Gedius. Pertgei ch’ei udevan els a plidond en lungatgs e ludond Diu. Cheu ha Pieder detg: Sa enzatgi snegar l’aua dil batten a quels che han retschiert il Spert sogn en medema maniera sco nus? Ed el ha dau ordras da battegiar els en num da Jesus Cristus. Silsuenter han ei supplicau el da star zacons dis cun els.
