dad Andri Casanova
Quella cuorta lecziun san ins leger d’enamiez ano. El center stat la «perdetga dalla levada dil Segner Jesus». Quei ei era il punct da partenza da nossa atgna cardientscha. Nies batten simbolisescha quella levada e renaschientscha. E nus astgein esser segirs che «reha grazia» ei cun nus tuts, pia ch’il Spert da Diu ei cun nus tuts.
Quei fundament communabel lai mirar nus en autra uisa sin possess e beinstonza. Negin carstgaun mereta da ver nuot. Ed aunc bia meins eis ei necessari da ver carplina per posta da possess. Essan nus buca clamai da suandar quei ideal dils emprems cristians e da vuler esser «in cor ed in’olma» e parter culs basignus?
Quella responsabladad sa veser ora per mintgin e mintgina fetg different. Mo ella ei tuttavia buca reservada als apostels.
Fatgs 4,32–35
La cuminonza dils cartents fuva in cor ed in’olma. Buc in scheva ch’enzatgei da quei ch’el possedeva seigi siu agen, anzi els vevan tut communabel. Cun gronda forza devan ils apostels perdetga dalla levada dil Segner Jesus, e reha grazia fuva cun els tuts. E buc in dad els veva miseria, pertgei tut quels che possedevan funs e casas, vendevan lur possess, vegnevan cul recav e mettevan quel giudapeis als apostels. A mintgin vegneva ei partiu o tenor siu basegns.
