da sora Armina Maissen
«Tgi che vul buca crer, sto sentir» ni «sch’ei gida buca cun la buna, va ei forsa cun la mala».
Talas expressiuns aud’ins mintgaton en la veta. Il text da nossa lecziun cuntegn semeglionts patratgs. Dieus ha adina puspei, ord carezia e malpuccau, admoniu ils perdavons per metter els sin la dretga via. Offender la carezia cun far beffas e rufidar il beinmanegiau, sa far ins brutal trests, sa svegliar gretta ed ei inacceptabel.
Dieus sforza buca il carstgaun al bien, mo el seretila e sto mirar tier, co siu pievel pitescha, perquei ch’el va vias puleinas e destruescha sez tut siu beinstar. El ei curdaus ord las leschas da Diu. E tuttina, Dieus en sia misericordia e fideivladad sa buca snegar sesez: «Sche nus essan malfideivels, stat el tuttina fideivels» (2 Tim 13). Il Segner tegn il carstgaun en egl, spetga sin el tochen che quel ei promts da retscheiver libramein sia misericordia e siu spindrament.
2 Cr 36,14–16.19–23
Era tut ils menaders da Juda, ils sacerdots ed il pievel fagevan bia dil mal, semegliont a tut las horrurs dils pagauns. Els profanavan il tempel ch’il Segner veva declarau sogns a Jerusalem.
Il Segner il Diu da lur perdavons veva adina puspei tarmess admoniziuns ad els entras ses nunzis. El veva numnadamein malpuccau da siu pievel e da sia avdonzail tempel. Mo els ein stai sfarfatgs cun ils mess da Diu, han sbittau ses plaids e fatg beffas cun ses profets, entochen che la gretta dil Segner ei vegnida schi gronda ch’ei dat negina scompamigliurament pli.
Ils Caldès han dau fiug alla casa da Diu, spazzau ils mirs da Jerusalem, arsentau el fiug tut ses palazs e destruiu tut sia rauba preziusa. Ins ha menau en perschunia a Babel quei ch’era mitschau dalla spada. Leu ein els stai survients dil retg e da ses affons entochen ch’il reginavel dils Persians ei vegnius tier pussonza. Aschia ei quei ch’il Segner veva plidau entras la bucca da Jeremia iu en vigur. Entochen ch’ils sabats vegnan puspei remplazzaiil ver tralaschau il ruaus dil sabbat vegn cumpensau, vegn la tiara a restar nuncultivada tut ils dis dalla devastaziun, tochen che siatont’onns ein spirai.
Igl emprem onn da Cirus, il retg dils Persians, ha quei ch’il Segner veva plidau entras la bucca da Jeremia duiu secumplenir. Il Segner ha svegliau il spért da Cirus, il retg dils Persians, e lez ha fatg proclamar en tut siu reginavel – ed era metter per scret – il sequent: Aschia plaida Cirus, il retg dils Persians: Jahveil num da Diu vegn tenor tradi-ziun giudaica buc exprimius (ins sa dir «il Segner»), il Diu dil Tschiel, ha dau a mi tut ils reginavels dalla tiara. El ha dau l’incumbensa a mi d’ereger ad el ina casa a Jerusalem en Juda. Scadin da vus che auda tier siu pievel: Il Segner seigi cun el! El mondi viasi!
