dad Andri Casanova
Sch’ins fa stem, nua ch’ils biars ein vegni en contact cun ils diesch condaments, sche para ei ina caussa zanistrada. Biars han giu d’emprender ordado els da ductrina. Po buc sbagliar la successiun ni emblidar in punct! E buca meins derasau ein las liungas gliestas da puccaus che vegnan ordinai tenor ils diesch condaments e duein esser in agid per prender penetienzia. Quei ein omisdus muments ch’ein per biars buc mo en buna memoria.
Perquei less jeu dar in’autra perspectiva: Ils diesch condaments fan gie part d’in raquent pli grond, numnadamein dil viadi dil pievel d’Israel ord l’Egipta. Dieus ha liberau siu pievel dalla sclavaria ed el vul dar a quel la libertad. Ed ual en quei intent sepresentan ils diesch condaments. Igl ei diesch plaids da Diu che muntan la finala libertad.
Ei drova forsa in mument per saver leger il text ord quella perspectiva, denton vala ei la peina.
Ex 20,1–17
Lez dis ha Dieus plidau tut quels plaids e detg:
Jeu sun il Segner tiu Diu che ha menau tei ord la tiara d’Egipta, ord la casa da sclaveria. Sper mei dueis ti ver negins auters dieus. Ti dueis far per tei negins vuts e negins maletgs ni da quei ch’ei en tschiel sisura, ni da quei ch’ei giu cheu sin tiara, ni da quei ch’ei ellas auas sut tiara. Ti dueis buc adurar quels ni survir ad els; pertgei jeu, il Segner tiu Diu, sun in Diu schalus che castigia la cuolpa dils babs tochen ella tiarza e quarta generaziun vid ils affons da quels che odieschen mei, mo che demuossa grazia tochen ella melliavla generaziun vid ils affons da quels che tegnan car mei e salvan mes camonds.
Ti dueis buc far maldiever dil num dil Segner tiu Diu; pertgei il Segner vegn buc a schar senza castitg quel che fa maldiever da siu num. Fai stem dil di dil sabat, che ti tegnies sogns quel. Sis dis dueis ti luvrar e far tut tias fatschentas. Mo il siatavel di ei in di da ruaus, consecraus al Segner tiu Diu. Lu dueis ti far negina lavur, ni ti ni tiu fegl ni tia feglia ni tiu fumegl ni tia fumitgasa ni tiu bov ni tiu jester ch’ei enteifer tias portaslas portas dil marcau. Pertgei en sis dis ha il Segner fatg tschiel e tiara e mar e tut quei ch’ei lien ed ha ruassau il siatavel di. Perquei ha il Segner benediu il di dil sabat e fatg sogns quel.
Fai honur a tiu bab ed a tia mumma, sinaquei che ti vivies ditg ella tiara ch’il Segner tiu Diu vul dar a ti.
Ti dueis buca mazzar.
Ti dueis buca rumper la lètg.
Ti dueis buca engular.
Ti dueis buca dar faulsa perdetga encunter tiu permer carstgaunencunter tiu proxim. Ti dueis buca ver queida per la casa da tiu permer carstgaun. Ti dueis buca garegiar la dunna da tiu proxim ni siu fumegl ni sia fumitgasa ni siu bov ni siu asen e negina caussa ch’ei sia.
