dad Ursicin G. G. Derungs
Legia, car* lectur*, la Genesis naven da 6,4–9,17. E metta quei el context della gronda unitad che cumpeglia Gen 1–11. Lu sas ti scuvierer diversas rasadas en quei raquent. L’emprema ei la detga d’in’aua gronda (Sintflut) che destruescha tut, mo lai surviver in. En tut las culturas primitivas ei quella da cattar. Ovid raquenta da quei en sias Metamorfosas I, 262ss.
La Genesis pren si quella detga enteifer ina retscha da «puccaus originals» naven da Cain ed Abel tochen tier la tuor da Babel (cap. 11), malfatgs che interrumpan l’ovra de Diu. Il «puccau original» che meina al diluvi ei la violenza derasada (6,11ss). Denton – quei ei il messadi da Gen 1–11 – la violenza humana ei buc il davos plaid.
Dad ina disdida a l’autra «cuntscha» Dieus la teila de sia benedicziun: quei ei il senn dellas genealogias cuntenidas en Gen 1–11 (p.ex. 4,17ss; 5 e 10). A Cain fa Dieus ina noda da schurmetg (4,15) per impedir che sia violenza schendri autra violenza. Ella lecziun de questa dumengia tschenta Dieus suenter il diluvi igl artg sco segn da sia ligia cun la humanitad. Mo quei ha (tochen oz?) buc impediu il puccau da supiervia idolatria cun la tuor da Babel (cap. 11), mo è buc ina nova cadeina da benedicziun da Sem tochen Abraham (11,10–35).
Gen 9,8–15
Dieus ha detg a Noeni «Noa» ed a ses fegls che eran cun el: Uarda, jeu statueschel mia ligia cun vus e cun vos descendents, era cun tuttas creatiras viventas che ein cun vus: Utschals, biestga e tuts animals dalla campagna che ein cun vus, e cun tut quels che ein vegni or dall’arca. Jeu vi statuir mia ligia cun vus che mai pli duei vegnir extirpada tutta carntuttas creatiras tras las auas dil diluvi, e ch’ei duei maina pli vegnir in diluvi per metter a smerscha la tiara.
Lu ha Dieus continuau: Quei duei esser l’enzenna dalla ligia che jeu fetsch denter mei e vus e tuttas creatiras viventas che ein ensemen cun vus per temps e perpetnadad. Miu artgartg sogn Martin ni era in ballester, el senn che Dieus vul pasch tschentel jeu els nibels; quei duei esser l’enzenna dalla ligia denter mei e la tiara. E sche jeu emplunel nibels sur la tiara e sch’igl artg cumpara els nibels, lu vi jeu seregurdar da mia ligia che exista denter mei e vus e tuttas creatiras viventas. E mai pli duein las auas daventar in diluvi che metta a smerscha tutta carn.
