da Maria Cristina Derungs-Bartolomei
Jesus mava tras la Galilea perdegond la buna nova de Diu, scatschond demunis e medegond malsauns. Cheu setract’ei d’in leprus. Ussa san ins ch’ina bacteria caschuna la lepra; ei dat persuenter medicaments e virola. Mo per millenis era ella ina sentenzia che bandischava alla mort sociala avon che corporala.
Il Veder Testament numna «lepra» (tzara’at) era ina pli leva malsogna della pial; ils pertuccai vegnevan tuttina isolai. Ella lepra vesev’ins la noda dil puccau. Da quella vegn ins perquei buca medegaus, mobein purificaus: reintegraus ella cuminonza ed el cult a Diu.
Jesus senuspescha buca da tuccar en la «lepra», las mendas dil carstgaun. Renconuschin nus las nunveseivlas «lepras» interiuras che disfigureschan nossa semegliadetgna cun Diu? Selaschein nus tuccar da Jesus, ni tenin nus el lontan da nus? Lein nus daveras viver sco nova creatira? Capin nus la cunzina dil silenzi: q.v.d. che Jesus vul buca esser tschercaus per sias «miraclas», mobein per daventar ina preschientscha viva en nies intern? Igl evangeli ei buca in cudisch da serrar ina gada ch’ins ha «empriu» quel. Tras el secommunichescha a nus il Plaid vivent. Tedlar el ei entupar Jesus. Perquei eis el adina novs ed ei far senn de leger e meditar el adina puspei.
Mc 1,40–45
40In leprus ei vegnius tier el, ha supplicau el en schanuglias e detg: Sche ti vul, sas ti purificar mei. 41Plein cumpassiun ha Jesus stendiu il maun, tuccau el e detg: Jeu vi, seigies purificaus! 42Ed immediat ei la lepra tschessada dad el, ed el ei staus purificaus. 43Jesus ha relaschau el, dend la cunzina: 44Mira da dir a negin nuot, mobein va e semuossa al sacerdot e fai per tia purificaziun l’unfrenda prescretta da Moses, per perdetga ad els. 45Mo quel ei ius naven ed ha entschiet a raquintar e far paleis la nova, da maniera che Jesus saveva buc entrar pli aviartamein en in marcau, mobein steva ordeifer el solitari. Ed ins vegneva tier el da tuttas varts.
