da sur Alfred Cavelti
Jesus leventa attenziun. Nua ch’el vegn, serimnan carstgauns entuorn el. En special malsauns da tgierp ed olma tschercan agid e forza tier el. El semuossa sco quel che porta migliurament e dat nova possa. Ina gada eisi in um che stat sut in squetsch psichic, ina ga in leprus, e quella dumengia eisi la sira da Simon Pieder ch’ei cun febra en letg. E lu ha ei num ch’ins hagi rabitschau tut ils malsauns tier el ed el hagi medegau biars ch’eran mudergiai da differents mals. Jesus fa quei a moda discreta, senza leventar sensaziun e gronda tschontscha. Adina puspei camonda el da buca risdar vinavon quei ch’el hagi fatg. Sia finamira ei dad annunziar il reginavel da Diu che daventa realitad en el e svegliar la fidonza en quei Diu che sempatscha dil carstgaun en sia miseria.
Mc 1,29–39
29E cura ch’ei han bandunau la sinagoga, eis el ius pei a pei ella casa da Simon ed Andriu ensemen cun Giachen e Gion. 30La sira da Simon fuva enta letg cun febra. Ed immediat han ei plidau cun el dad ella. 31El ei ius vitier, ha priu ella pil maun ed alzau si ella. E la febra ha bandunau ella, ed ella ha surviu ad els.
32La sera, suenter ch’il sulegl era ius da rendiu, han ins rabitschau tier el tut ils malsauns e malspirtai, 33ed igl entir marcau fuva radunaus avon porta. 34Ed el ha medegau biars che fuvan mudergiai da differents mals ed ha scatschau bia demunis, mo el ha buca schau plidar ils demunis, pertgei els savevan tgi ch’el seigi.
35La damaun marvegl, aunc avon ch’ei catschi dis, eis el levaus, ius giuadora e serendius en in liug solitari, e leu ha el fatg oraziun. 36Simon ei daus suenter ad el cun ses cumpogns. 37Ed havend anflau el, han ei detg ad el: Tuts enqueran tei. 38El ha rispundiu ad els: Lein ir enzanu’ auter, els vitgs vischinonts, per che jeu porti era leu la nuviala; perquei sun jeu sortius. 39Ed el ei ius tras tut la Galilea, perdegond en lur sinagogas e scatschond demunis.
