da Flurina Cavegn-Tomaschett
Il sabat serimna la cuminonza gediua ella sinagoga per festivar il survetsch divin. Sco mument central vala la prelecziun dalla scartira sontga. Mintga Gediu carschiu astga da principi enneu s’exprimer davart ils texts udi. Jesus pren quella caschun dad annunziar siu messadi. Davart il cuntegn da siu plaid vegn fatg negina menziun. Ton pli vegn denton rapportau dalla forza ed autoritad ch’ei sortida da tal. El plidava sco in, che veva sez da dir enzatgei e buca mo repeter quei ch’auters havevan detg.
En la medema crena dat era la miracla che suonda. Jesus deliberescha in carstgaun che vegneva mudergiaus dad in spért malmund. Ei fa surstar, co Jesus analisescha las renfatschas da quei carstgaun enviers el ed attribuescha il cunfar digl um ad in esser prius en possess d’in nauschaspert.
Igl ei l’emprema miracla da Jesus che vegn descretta digl evangelist Marc. La scena muossa, che Jesus ha giu da cumbatter naven dall’entschatta da sia via cun pussonzas stgiras. La scena muossa denton era, ch’ei drova sulet in plaid divin, per che l’olma d’in carstgaun daventa sauna.
Mc 1,21–28
21Els ein entrai a Cafarnaum. E cun l’emprema caschun ei Jesus ius il sabat ella sinagoga ed ha instruiu. 22Ed ins era tut surprius da sia ductrina, pertgei el instrueva els sco in che ha pussonza e buca sco ils mussaders dalla lescha.
23En lur sinagoga fuva gest in carstgaun cun in spért malmund che ha entschiet a grir: 24Tgei vein nus da far cun tei, Jesus da Nazaret? Ti eis vegnius per metter a frusta nus. Jeu sai tgi che ti eis: Il Sogn da Diu. 25Mo Jesus ha smanatschau ad el: Quescha e va orda quei carstgaun! 26Ed il spért malmund ha stratg el vidaneu ed ei sortius dil carstgaun, dend ina termenta burlida. 27Tuts fuvan plein smarvegl e dumandavan in l’auter: Tgei ei quei? Ina nova ductrina, dada cun pussonza! Perfin als spérts malmunds camonda el, ed els obedeschan ad el! 28E cuninaga ei la tuna dad el serasada dapertut egl entir contuorn dalla Galilea.
