dad Andri Casanova
Jesus ei ella Galilea – l’emprema staziun da siu agir – ed annunzia la buna nova. Suandont igl evangeli tenor Marcus cuntegn quest passadi ils emprems plaids che Jesus exprima. Igl ei plaids centrals che vulan era plidentar nus. Els selain divider en treis pass:
1) Jesus di ch’il reginavel da Diu ei damaneivel, ni detg en auters plaids, ch’in temps divin ha entschiet. Il reginavel da Diu ei buc enzatgei exclusiv per ils megliers dils megliers. Anzi, el ei in regal divin ch’ei presents ed actuals senza cundiziuns.
2) Lu cloma Jesus da seconvertir e crer. Quei ei la risposta che nus carstgauns savein dar en vesta a quei temps divin ch’ei regalaus a nus.
3) Mo co duei quei succeder? Enten dar suatientscha als ulteriurs plaids: «Suandei mei!» Ils giuvnals ed ils texts biblics dalla buna nova gidan nus leutier.
Mc 1,14–20
14Suenter che Gion ei staus mess a ferm, ei Jesus serendius en Galilea. Leu ha el annunziau la buna nova da Diu e detg: 15Cumplenius ei il temps, ed il reginavel da Diu ei damaneivel: Seconverti e cartei alla buna nova!
16Viandond suenter la mar da Galilea, ha el cattau ad agur Simon e siu frar Andriu che ferevan la reit ella mar; pertgei els eran pescadurs. 17E Jesus ha detg ad els: Suandei mei, e jeu vegnel a far orda vus pescadurs da carstgauns. 18Ed immediat han ei bandunau lur reits ed ein suandai el.
19E mond in tschancunet vinavon, ha el cattau ad agur Giachen, il fegl da Zebedeus, e siu frar Gion; era els fuvan ella barca e cuntschavan lur reits. 20Immediat ha el clamau els. Ed els han schau lur bab Zebedeus cun ses fumegls da schurnada ella barca ed ein suandai el.
