da sur Martin Bearth
Gion Battesta numna Jesus il «tschut da Diu». Quei regorda nus al tschut en l’Egipta che veva spindrau cun siu saung ils Israelits dalla mort e dalla sclavaria. E mellis tschuts vegnevan era unfri onn per onn a Jerusalem per engraziar a Diu e rugar el per sia benedicziun e protecziun.
Ussa ei Jesus il tschut da Diu che unfrescha sia veta per nies spindrament e pil spindrament dall’entira scaffiziun. Ils dus frars, Andriu e Simon, suondan Jesus. Sto esser ch’els fuvan carstgauns ch’encurevan, che vevan in cor malruasseivel, sco sogn Augustin di, plein desideri per Diu. Cun ils plaids: «Nus vein anflau il Messias», envida Andriu siu frar Simon da vegnir cun el e semetter sin via cun Jesus.
Muossa Andriu buc era a nus a moda impressiunonta, co era nus duessen envidar in l’auter silla via cun Jesus? Era la cardientscha ei in viadi e drova il concarstgaun.
Gn 1,35–42
35Il di sissu steva Gion puspei leu cun dus da ses giuvnals. 36Mond Jesus sperasvi, ha Gion drizzau sia egliada sin el e detg: Mirei, il Tschut da Diu! 37Ils dus giuvnals han udiu siu plaid ed ein suandai Jesus. 38Mo Jesus ei seviults e vesend ch’els suandavan el, ha el emparau: Tgei encuris? Els han rispundiu: Rabbi – quei vul dir Mussader – nua stas ti? 39El ha dau per risposta: Vegni e mirei! Els ein i cun el ed han viu, nua ch’el steva ed ein restai cun el quei di. Ei fuva entuorn la dieschavla ura.
40Andriu, il frar da Simon Pieder, fuva in da quels dus che vevan udiu il plaid da Gion ed eran suandai Jesus. 41Quel ha entupau igl emprem siu frar Simon ed ha detg ad el: Nus vein anflau il Messias – quei vul dir igl Unschiu. Ed el ha menau Simon tier Jesus. 42Jesus ha mirau sin el e detg: Ti eis Simon, il fegl da Gion, ti dueis ver num Chefas – quei vul dir il grep.
