da sora Armina Maissen
Gion Battesta vegn tarmess da Diu per dar perdetga da sia glisch che viva en nus tuts, sinaquei che nus carteien en el! Gion Battesta stueva haver, malgrad sia marcanta personalitad e cumparsa, in immens carisma, ch’ei vegn declarau: «El era buca la glisch, mobein dueva dar perdetga dalla glisch» (Gn 1,8). Quei carisma vesel jeu en sia humilitonza che ha schau rispunder el als farisès: «En vies miez stat in che vus enconuscheis buc. El vegn suenter mei ed jeu sun buca vengonzs da snuar las curegias da sias sandalas» (Gn 1,26b–27).
«Preparei ed ulivei la via pil Segner!» – ina vusch, in’admoniziun gia da Jesaja, varga 500 onns avon Cristus (cf. Jes 40,3). E quella serepeta tier Gion Battesta. Savess quei esser che quella vusch, quei appel serepeta gest ussa puspei en quei temps dalla pandemia Corona? Lein tedlar fetg bein:
Cartei en mei! – Seigies allerts e pli essenzials! – Vegni pli mudests en vossas pretensiuns e vos divertiments, – vegni pli humiliteivels – pli ruasseivels! – Vivi la carezia!…
Sche quei reussescha, mein nus rinforzai e pli cuntents ord quella crisa egl avegnir.
Gn 1,6–8.19–28
6Vegnius ei in carstgaun tarmess da Diu, cun num Gion. 7Quel ei vegnius sco perdetga, per dar perdetga dalla glisch, sinaquei che tuts creigien tras el. 8El era buca la glisch, mobein dueva dar perdetga dalla glisch.
19Quei ei la perdetga da Gion: Cura ch’ils Gedius han tarmess da Jerusalem sacerdots e levits tier el cun la damonda: Tgi eis ti? 20sche ha el confessau e buca snegau. El ha confessau: Jeu sun buc il Messias. 21Els han dumandau el: Sche tgi pia? Eis ti Elia? Ed el ha detg: Jeu sun buca lez. – Eis ti il profet? El ha rispundiu: Na. 22Cheu han ei dumandau: Tgi eis ti pia? Nus stuein dar risposta a quels che han tarmess nus. Tgei dias ti da tetez? 23El ha detg: Jeu sun la vusch dad in che grescha el desiert: Ulivei la via dil Segner, sco il profet Jesaja ha detg.
24Ils tarmess fuvan farisès. 25Els han dumandau el: Pertgei battegias ti lu, sche ti eis buc il Messias, buc Elia e buc il profet? 26Gion ha rispundiu ad els: Jeu battegel cun aua. En vies miez stat in che vus enconuscheis buc. 27El vegn suenter mei, e jeu sun buca vengonzs da snuar las curegias da sias sandalas. 28Quei ei daventau a Betania, da l’autra vart dil Jordan, nua che Gion battegiava.
