da Marcel Köhle
«Preparei la via dil Segner, ulivei sias sendas!» – Mintga gronda fiasta entscheiva cun preparaziuns. Aschia eis ei era tier la fiasta da Nadal: far biscuits da Nadal, decorar la casa, metter si il pigniel da Nadal ed aunc bia autras caussas.
Igl evangeli da questa dumengia muossa denton aunc in auter aspect: Il profet Gion ha muossau e perdegau al pievel sin tgi ch’els duein spitgar. Cun mussar vi sin Jesus e sin sia persuna ha el preparau sia vegnida tier ils carstgauns.
Aschia sa il temps d’advent era esser in temps dalla preparaziun dil cor. Tras l’oraziun e la lectura e la meditaziun dil Plaid da Diu dein nus a Niessegner ina nova schanza da vegnir en nossa veta. Nezegiein nus quella pusseivladad e lein mirar sin tgei via che Niessegner vegn tier nus!
Mc 1,1–8
1Entschatta dalla buna nova da Jesus Cristus, Fegl da Diu.
2Aschia stat ei scret el cudisch dil profet Jesaja:
Uarda, jeu tarmettel miu mess ordavon a ti,
ch’el prepari tia via.
3La vusch dad in che grescha el desiert:
Preparei la via dil Segner,
ulivei sias sendas!
4Aschia ei Gion vegnius a battegiar el desiert ed ha proclamau in batten da conversiun per la remischun dils puccaus. 5E l’entira cuntrada dalla Giudea e tut ils avdonts da Jerusalem mavan viado tier el. Ei vegnevan battegiai dad el ell’aua dil Jordan e confessavan lur puccaus. 6Gion fuva vestgius cun in manti da peil camel e veva ina tschenta da curom entuorn veta. El magliava saleps e mèl selvadi. El perdegava e scheva: 7Suenter mei vegn in ch’ei pli pussents che jeu; jeu sun buca vengonzs da sestorscher avon ses peis e snuar las curegias da ses calzers. 8Jeu hai battegiau vus cun aua, mo el vegn a battegiar vus cun il Spert sogn.
