da sur Marcus Flury
Per resumar il text da quei evangeli, tonscha in sulet plaid, il plaid «vegliei!». Vegliar san ins ord differents motivs. Ins veglia forsa, perquei ch’ins less buc vegnir surprius d’enzatgei negativ. Ins sa vegliar, perquei ch’ins spetga in carstgaun, ni perquei ch’ins less buca schar persuls in malsaun ni moribund. Vegliar vul era dir: Esser cheu, esser allerts e viver a moda cunscienta.
Vegliar, sco Jesus manegia munta, sepreparar per ina sentupada, per la sentupada cun El. Quella sentupada schabegia sur ura. Prender serius Nadal vul dir: Prender serius che Dieus daventa carstgaun e vul s’entupar cun nus en differents carstgauns ed en differentas caussas. Bunamein tut quei ch’ei entuorn nus, sa mussar sin Diu e daventar ina caschun da sentupada. Per che quei sappi denton schabegiar, drov’ei da nossa vart il «vegliar».
Mc 13,33–37
33Dei adatg e vegliei, pertgei vus saveis buca cura ch’il temps ei cheu! 34Ei vegn ad esser sco cun in um ch’ei ius egl jester: El ha bandunau sia casa, surschau tut al quitau dils fumegls e dau a mintgin sia lavur. Ed al portaner ha el cumandau da vegliar. 35Vegliei pia, pertgei vus saveis buca cura ch’il patrun-casa tuorna: La sera, da mesanotg, cura ch’il tgiet conta ni la damaun. 36El duei buc anflar vus durmend, sch’el tuorna tut surura. 37E quei che jeu ditgel a vus, ditgel jeu a tuts: Vegliei!
