da Maria Cristina Derungs-Bartolomei
Quei evangeli metta nus empau en perfetg. Pertgei fuss ei buca bien avunda de tener si cun quitau ils beins ch’il patrun ha confidau a nus? Tgei ha quei survient fatg dil «mal»? In indezi anflein nus en quei che para in detagl: il patrun ha dau a mintgin «tenor sias forzas». Pia ha el dau in «dun» che duess vegnir activaus. Tgi retschevess p.ex. plontinas ni sems da flurs per metter quei en salv e dar anavos ei pli tard? Clar ch’el vess da plantar e semnar e far crescher quei.
La semeglia muossa in Diu che sefida dils humans, che surdat ad els il pensum d’ademplir sco delegai sias ovras ella historia. Alla fin dils temps vegn la raccolta, e quella muossa co ils duns retscharts han fatg fretg. E cheu seresulta ch’ins fa mal da buca far il bien! Pertgei cheu ei in carstgaun che sefida buca da Diu, che entra buca en relaziun da fidonza cun El, che vul buca riscar en siu num, mobein che vul sedefender da Diu ch’el considerescha sco patrun pretensius e dir. Ed aschia condemnescha el sia veta alla nunfritgeivladad ed alla munconza da senn. Pertgei il «fretg» de quels talents ei la «construcziun» da nusez en Diu.
Mt 25,14–30
14Igl ei sco cun in um che leva ir egl jester. El ha clamau ses fumegls e confidau ad els sia rauba. 15Ad in ha el surdau tschun talents, ad in auter dus, ad in tierz mo in, a mintgin tenor sias forzas. Lu eis el partius. 16Immediat ei quel che veva retschiert tschun talents ius ed ha luvrau cun els e recaltgau aunc tschun talents. 17Semegliontamein ha quel che veva retschiert dus talents aunc gudignau dus auters. 18Mo quel che veva retschiert mo in, ei ius, ha cavau ina ruosna ella tiara e zuppau ils daners da siu patrun. 19Suenter liung temps ei il patrun da quels fumegls turnaus ed ha fatg quen cun els. 20Quel che veva retschiert tschun talents ei vegnius neutier, ha purtau tschun auters talents e detg: Signur, ti has confidau a mi tschun talents; uarda, jeu hai gudignau aunc tschun. – 21Stupent, ti bien e fideivel fumegl, ha siu patrun detg ad el, sur da pauc eis ti staus fideivels, sur da bia vi jeu tschentar tei; entra ella letezia da tiu Signur. 22Era quel che veva survegniu dus talents, ei vegnius neutier ed ha detg: Signur, ti has confidau a mi dus talents; uarda, jeu hai gudignau aunc dus. 23Stupent, ti bien e fideivel fumegl, ha siu patrun detg ad el, sur da pauc eis ti staus fideivels, sur da bia vi jeu tschentar tei; entra ella letezia da tiu Signur. 24Il davos ei era quel che veva survegniu in talent vegnius ed ha detg: Signur, jeu savevel che ti seigies in um rigurus: Ti raccoltas, nua che ti has semnau nuot, e rimnas, nua che ti has mess nuot. 25Perquei sun jeu ius plein tema ed hai zuppau tiu talent ella tiara; cheu has ti quei ch’ei tiu! 26Mo siu patrun ha rispundiu ad el: Ti schliet e marsch fumegl! Ti savevas che jeu raccolti, nua che jeu hai semnau nuot, e rimni, nua che jeu hai mess nuot. 27Perquei vesses ti stuiu purtar mes daners alla banca, e jeu vess tier miu retuorn saviu retscheiver miu dabien cun tscheins e tut. 28Prendei naven ad el il talent e dei el a quel che ha diesch talents! 29Pertgei a scadin che ha vegn ei dau aunc dapli, ed el ha abundonza; mo a quel che ha buc vegn ei aunc priu quei ch’el ha. 30E quei fumegl malnizeivel feri giuado ella stgiradetgna. Leu vegn ad esser bargir e sgriziar ils dents.
