da sur Alfred Cavelti
Il maletg dalla tschavera festiva serepeta savens ella sontga Scartira sco maletg dalla veta eterna, alla quala tuts astgan prender part ch’ein aviarts per Diu. Per arrivar in di tier il Segner – quei accentuescha la semeglia dallas giuvnas prudentas ed ureidias – stuein nus emplenir nossas amplas cun ieli. Quei ieli ei la cardientscha en in Diu che stat sur nus ed ei cun nus. Quei ieli ei nies sesentir responsabels per nusezzi, per nossa missiun persunala, per auters, per la veta. Quei ieli ei nossa carezia che nus dein ad auters ed essan aschia glisch per els. Cun il quitau per quei ieli semussein nus veglionts per il Segner ed essan restiai per sia vegnida.
Mt 25,1–13
1Lu eis ei cul reginavel da tschiel sco cun diesch giuvnas che han priu lur amplas ed ein idas encunter al spus. 2Tschun dad ellas eran ureidias e tschun prudentas. 3Las ureidias han bein priu lur amplas, mo han buca priu ieli cun ellas, 4ferton che las prudentas han el medem temps cun lur amplas era priu ieli en lur vischals. 5Damai ch’il spus era s’entardaus, han tuttas cupidau ed ein sedurmentadas. 6Mo da mesanotg han ins udiu il clom: Il spus ei cheu! Mei encunter ad el! 7Ussa ein tut quellas giuvnas stadas en pei ed han preparau lur amplas. 8E las ureidias han detg allas prudentas: Dei a nus da vies ieli, pertgei nossas amplas stezzan. 9Mo lezzas han rispundiu: Ch’ei tonschi forsa ni per nus ni per vus! Mei plitost tiels vendiders e cumprei per vus. 10Ferton ch’ellas ein idas a cumprar, ei il spus arrivaus. Quellas ch’eran preparadas ein entradas cun el ella sala da nozzas, e la porta ei vegnida serrada. 11Finalmein ein era las autras giuvnas vegnidas ed han clamau: Segner, Segner, arva a nus! 12Mo el ha rispundiu: En verdad, jeu ditgel a vus: Jeu enconuschel buca vus. 13Vegliei pia, pertgei vus saveis ni il di ni l’ura.
