da Flurina Cavegn-Tomaschett
Igl evangeli per la fiasta da Numnasontga cuntegn las schinumnadas nov beadientschas che Jesus drezza enviers sias giuvnalas e ses giuvnals. Cheu setracta ei da certas pretensiuns pil reginavel da Diu, denton ein ellas buca formuladas sco duers ni sco admoniziuns, mobein sco gratulaziuns. «Beai quels…» vul dir ton sco «Gratulaziun a quels…» Il gest cumportament sin tiara resp. ils deficits terresters vegnan remunerai in di en tschiel. Igl ei in text che radiescha gronda consolaziun e speronza, gest per quels che stattan sin la vart umbrivauna dalla veta. Ils plaids da Jesus empermettan che la munconza da quei mund daventa abundonza en l’auter mund.
Per drizzar quels plaids al pievel va Jesus sin in cuolm. Cheu semuossa inaga dapli ch’ils cuolms ein loghens nua che carstgauns sentan ina vischinonza speciala al tschiel – ed a Diu. Ils plaids che Jesus drezza cheu als carstgauns valan sco siu grond program. Quels plaids ein era vegni pri a cor da biaras dunnas ed umens ch’ein i sco sontgas e sogns en la tradiziun dalla baselgia. Dad els vegn commemorau oz, il di da Numnasontga. Ad els astga vegnir gratulau per lur via tras la veta terrestra.
Mt 5,1–12a
1Vesend Jesus las roschas, eis el ius sil cuolm. El ei sesius, e ses giuvnals ein vegni neu tier el. 2Cheu ha el aviert sia bucca ed instruiu els schend: 3Beai ils paupers el spért, pertgei a quels auda il reginavel da tschiel. 4Beai ils cuntristai, pertgei els vegnan a vegnir consolai. 5Beai ils migeivels, pertgei els vegnan ad artar la tiara. 6Beai quels che han fom e seit per la giustia, pertgei els vegnan a vegnir saziai. 7Beai ils misericordeivels, pertgei els vegnan a retscheiver misericordia. 8Beai quels d’in schuber cor, pertgei els vegnan a veser Diu. 9Beai quels che lavuran per la pasch, pertgei els vegnan a vegnir numnai affons da Diu. 10Beai quels che vegnan persequitai per amur dalla giustia, pertgei ad els auda il reginavel da tschiel. 11Beai essas vus, sch’ins smaledescha e persequitescha vus e di da vus faulsamein da tut mal per amur da mei. 12Selegrei e giubilei, pertgei vossa pagaglia ei gronda en tschiel.
