da ser Jan-Andrea Bernhard
Ina damonda centrala en nossa veta ei adina: Avon tgi sundel jeu responsabels? Per tut che jeu fetschel? Eis ei il stadi, eis ei la baselgia, eis ei mia famiglia?
Quella damonda ei stada centrala per biars cristians duront tschentaners: Avon tgi sundel jeu responsabels? Sche jeu vesel certas caussas auter che la baselgia ufficiala? Davostier stat la damonda dalla cunscienzia: Sche jeu gitgel buca la verdad – lu hai jeu schliata cunscienzia. Quei vala era per la cardientscha: Sche jeu gitgel enzatgei encunter mia perschuasiun ella cardientscha, lu stos jeu viver cun mia perdetga fallida – e jeu stos in gi star avon Niessegner e Salvader cun mia cunscienzia. La fin finala sundel jeu responsabels per tut miu far e dar avon Deus, il scaffider dil tschiel e dalla tiara.
Clar che Jesus gi ch’ins dei dar agl imperatur quei che s’auda ad el. A Deus s’auda enzatgei auter: mia vardeivladad, miu spért enriclont, mia bunaveglia e mia supplica da perdunament.
Mt 22,15–21
15Ussa ein ils farisès i ed han teniu cusseida co pigliar Jesus en in discuors. 16Ed ei han tarmess tier el lur giuvnals ensemen cun herodians per dir ad el: Mussader, nus savein che ti eis verdeivels e che ti muossas la via da Diu tenor la verdad. Ti prendas risguard da negin, pertgei ti miras buca silla persuna dils carstgauns. 17Di a nus pia tiu pareri: Eis ei lubiu da pagar taglia agl imperatur ni buc? 18Mo Jesus, enconuschend lur malignadad, ha detg: Simuladers! Pertgei tenteis mei? 19Mussei a mi la muneida dalla taglia. Ei han purschiu ad el in denar. 20Ed el ha detg ad els: Da tgi ei quei maletg e l’inscripziun? – 21Digl imperatur, han ei rispundiu. Lu ha el detg ad els: Sche dei pia agl imperatur quei che auda agl imperatur ed a Diu quei che auda a Diu.
