da sur Martin Bearth
Tgei bi maletg che Jesus drova en sia semeglia per declarar tgei ch’el manegia cun il «reginavel da Diu»: Ina fiasta da nozzas! Ei dat differentas declaraziuns per dir tgei che Jesus vegli cun quei plaid. Igl ei segir buca falliu, sche nus prendein ch’el manegi era il parvis. Il retg ch’envida allas nozzas da siu fegl, fuss lu Dieus il Bab. Il fegl fuss Jesus, ed ils envidai fussen nus carstgauns, nus tuts.
Dieus careza nus e vul far fiasta cun nus. Tgei gronda honur d’astgar far fiasta cun Diu! Mo per bia buca tuts sehonan dall’invitaziun. Inaparts vulan saver nuot, auters fan gnanc stem ed entgins mazzan schizun quels che vegnan per envidar els. Strusch da capir! La finala vegnan auters envidai, semplamein da quels dallas vias. In sulet dad els vegn a fiasta senza il vestgiu da nozzas. Cun quel e cun ils auters che han refusau l’invitaziun, va ei mal. – Tgei vul Jesus bein dir oz cun quella semeglia: a nus, a ti ed a mi?
Mt 22,1–14
1E puspei ha Jesus priu il plaid e plidau en semeglias cun els schend: 2Il reginavel da tschiel ei semeglionts ad in retg che ha preparau las nozzas a siu fegl. 3El ha tarmess ses survients a clamar ils envidai a nozzas, mo quels han buca vuliu vegnir. 4Puspei ha el tarmess auters survients ed ha detg a quels: Schei als envidai: Mirei, jeu hai preparau miu past; bovs ed armauls engarschai ein mazzai, tut ei promt, vegni a nozzas! 5Mo quels han nuota fatg stem ed ein i per lur fatg, tgi sin siu funs e tgi en sia fatschenta; 6ed ils auters han tschappau ils survients, han maltractau e sturniu els. 7Sinquei ei il retg vegnius en gronda gretta, ha spert tarmess si’armada che ha mazzau quels assassins ed arsentau lur marcau. 8Lu ha el detg a ses survients: Las nozzas ein preparadas, mo ils envidai ein buca stai vengonzs. 9Mei pia ora sillas cruschadas dallas vias e clamei a nozzas tut quels che vus anfleis. 10Ed ils survients ein i ora sillas vias ed han rimnau tut quels ch’ei han anflau, buns e schliats. E la sala da nozzas ei s’emplenida cun hosps.
11Lu ei il retg entraus per veser ils hosps, e cheu catta el ad agur in um che veva buc en il vestgiu da nozzas. 12Amitg, di el a quel, co eis ti entraus en cheu senza vestgiu da nozzas? L’auter ha cuschiu. 13Cheu di il retg als survients: Ligei peis e mauns ad el e betti giuadora el ella stgiradetgna; leu vegn ad esser bargir e sgriziar ils dents. 14Pertgei biars ein clamai, mo paucs eligi.
