dad Andri Casanova-Baumgartner
Sche nus legin e ponderein bein, tgei che quels vignerols fan enteifer quella semeglia, sche dat ei bein mo ina risposta: Quels ein dil tuttafatg orda senn! Mo, tgi ein els e tgi ein ils fumegls ed il fegl?
Tenor musters dil Veder Testament (cf. Jes 5,1–7; Ps 118,22) eis ei evident ch’ils fumegls simboliseschan ils profets persequitai. Ed ord optica dil Niev Testament stat il fegl dil patrun secapescha per Jesus. E per capir, tgi ch’ei da colligiar cun ils vignerols, dat igl evangeli tenor Mattiu ual sez ina risposta: «Udend sias semeglias, han ils premsacerdots e farisès encurschiu ch’el plidava dad els» (Mt 21,45). Pia fuvan els quels tals che semettevan encunter la veglia da Diu, encunter uorden e giustia.
Pia regorda la semeglia nus a duas caussas: 1) Il reginavel da Diu munta giustia. Egoissem e violenza audan buca neucheu. 2) La crudeivla mort da Jesus ei daventada entschatta per ina admirabla ovra dil Segner. Ed en quell’ovra essan nus ils vignerols. Lein pia ver quitau in da l’auter e purtar bien fretg.
Mt 21,33–43
33Tedlei in’autra semeglia. Ei fuva in proprietari. Quel ha plantau ina vegna, circumdau ella cun ina seiv, cavau lien in torchel ed erigiu ina tuor. Lu ha el schau a tscheins ella a vignerols ed ei ius egl jester. 34Arrivaus il temps da raccolta, ha el tarmess ses survients tiels vignerols per retscheiver ils fretgs. 35Mo ils vignerols han cargau ils survients: In han ei bastunau, l’auter mazzau ed in tierz encarpau. 36Puspei ha el tarmess auters fumegls, pli biars che l’empremaga, mo ei han fatg cun quels il medem. 37La finala ha el tarmess siu fegl tier els cul patratg: Miu fegl vegnan ei bein a respectar. 38Mo vesend il fegl, han ils vignerols detg in siper l’auter: Quei ei igl artavel. Vegni! Lein mazzar el, e sia ierta ei nossa. 39Ed ei han tschappau el, han fiers el ord la vegna e mazzau el. 40Tgei vegn bein il patrun dalla vegna a far cun quels vignerols, cura ch’el tuorna? 41Ei han rispundiu ad el: Quels miserabels vegn el a far ir malamein alla malura, ed el vegn a schar vi sia vegna ad auters vignerols che dattan ad el ils fretgs a dretg temps. 42Jesus ha detg ad els: Veis vus aunc mai legiu ellas scartiras:
Il crap ch’ils baghegiaders han rufidau,
lez ei daventaus il crap da cruna.
Quei ei l’ovra dil Segner,
ed ella ei admirabla en nos egls.
43Perquei ditg jeu a vus: Il reginavel da Diu vegn retratgs da vus e confidaus ad in pievel che porta ses fretgs.
