da Mariano Tschuor
Las semeglias da Jesus ein ina provocaziun cuntinuonta. El va bugen als cunfins da quei ch’in human po supportar. Pitaunas e publicans ell’emprema retscha, buc quels che suondan el en gronda admiraziun e devoziun. El concept da Jesus vala ina veta lischada apparentamein dapli ch’ina tala bein organisada. Quei ei fatal tochen sil di dad oz. Buca quellas e quels empleni dall’illusiun d’esser en posses dalla verdad absoluta van el «reginvel», mobein quels ch’enqueran, han dubis – e creien.
Crer ei zatgei intim, crer ei ina reit tessida bufatgamein ellas relaziuns verticalas ensi tier Diu e horizontalas tier ils carstgauns. Sin quella reit semova ed agescha il carstgaun cartent – cun tut quei che la cundiziun humana implichescha: stenta e fastedi, desillussiun e trumpada, legria e letezia. Nus stuein buc ual prender ils publicans e las pitaunas sco exempel per ir nossa via, ei basta sche nus stein cun tut quei che nus essan avon el, promts per la ricla e la metanoia, promts da supplicar el: «Gida mei, Segner, da crer».
Mt 21,28–32
28Mo tgei manegeis da quei? In um veva dus fegls. El ei ius tier igl emprem ed ha detg: Miu fegl, va ti oz ella vegna! – 29Jeu vi buc, ha quel rispundiu. Mo pli tard eis el s’enriclaus ed ei ius. 30Lu eis el ius tier il secund fegl ed ha detg il medem. Lez ha rispundiu: Giebein, miu signur! Mo ius eis el buc. 31Tgeinin da quels dus ha fatg la voluntad dil bab? – Igl emprem, han ei rispundiu. Jesus ha detg ad els: En verdad, jeu ditgel a vus: Ils publicans e las pitaunas vegnan ad ir avon che vus el reginavel da Diu. 32Pertgei Gion ei vegnius tier vus sin la via dalla giustia, e vus veis buca cartiu enten el; ils publicans e las pitaunas denton han cartiu enten el. Vus veis viu quei, mo veis gnanc lu fatg ricla e cartiu enten el.
