da Marcel Köhle
«Misericordia» e «perdun» ein dus cavazzins centrals egl evangeli da questa dumengia. Silla damonda da Pieder rispunda Jesus ch’ins dueigi perdunar a moda generusa ed illustrescha quei cun ina semeglia.
Mo tuttina tschentan biars la damonda: «Daco duei jeu insumma perdunar, tgei porta quei?» – Sch’ins vesa con crudeivel ch’ils carstgauns tractan in l’auter e cons ch’emprendan nuot ord lur sbagls e puccaus, gie, lu san ins bein sedumandar daco ch’ins duei perdunar generusamein.
Tier il perdunar va ei buca mo per igl act, mobein era per la tenuta. – Misericordia e perdun entscheivan en nos cors. Sche nus sentin conta misericordia che Dieus schenghegia a nus, lu eis ei era pli sempel dad esser misericordeivels culs concarstgauns e da perdunar in a l’auter. – Perquei eis ei impurtont da rugar Diu ch’el detti a nus in cor misericordeivel e la forza da perdunar (sco el perduna adina puspei a nus). Aschia sa ei dar ina nova entschatta, e mintgin survegn ina schanza sch’el ha falliu. E quella schanza drova mintgin da nus adina puspei.
Mt 18,21–35
21Lu ei Pieder vegnius neutier ed ha detg: Segner, contas ga hai jeu da perdunar a miu frar, sch’el fallescha encunter mei? Forsa tochen siat ga? 22Jesus ha rispundiu ad el: Jeu ditgel a ti, buca tochen siat ga, mobein tochen siatonta ga siat ga.
23Il reginavel da tschiel ei numnadamein semeglionts ad in retg che leva far quen cun ses survients. 24Havend entschiet a far quen, han ins menau tier el in ch’era culponts ad el dieschmelli talents. 25Cunquei ch’el era buca buns da pagar, ha il patrun cumandau da vender el, sia dunna, ses affons e tut sia facultad per pagar il deivet. 26Cheu ei il survient sefretgs avon ses peis ed ha rugau el: Hagies pazienzia cun mei, e jeu vi pagar tut. 27Il patrun ha lu giu cumpassiun da quei survient, ha dau liber el e relaschau tut siu deivet ad el. 28Mond giuadora, ha quei fumegl entupau in da ses confumegls ch’era culponts ad el tschien denars. El ha cargau quel pil cavez e detg: Paga quei che ti eis culponts! 29E siu confumegl ei sefretgs avon ses peis ed ha rugau el: Hagies pazienzia cun mei, e jeu vi pagar tut. 30Mo l’auter ha buca vuliu, mobein el ius ed ha fatg metter el en perschun, tochen ch’el hagi pagau il deivet. 31Vesend quei ch’era daventau, ein ses confumegls stai tut indignai. Els ein i ed han raquintau a lur patrun tut quei ch’era capitau. 32Quel ha fatg vegnir il survient ed ha detg ad el: Ti miserabel cumpogn! L’entira summa che ti eras culponts a mi, hai jeu relaschau a ti, perquei che ti has rugau mei. 33Vesses buca era ti stuiu ver cumpassiun da tiu confumegl, sco jeu hai giu cumpassiun da tei? 34E plein gretta ha il patrun surdau el als sbiers, tochen ch’el hagi pagau igl entir deivet. 35Aschia vegn era miu Bab celestial a far cun vus, sche scadin da vus perduna buca da cor a siu frar.
