da sur Marcus Flury
«Quei ei buca miu problem!» Contas gadas aud’ins quei. Cun dir quei manegian ins da saver sesluitar ord la responsabladad. Po buca semischedar en schinumnai fatgs dad auters!
Semischedar en fatgs dad auters, mirar naven, ni gidar enzatgi, ein duas caussas. Igl evangeli paleisa a nus en quei senn certas reglas che han aunc oz vigur.
«Sche tiu frar fallescha, va ed admonescha el, ti persuls cun el.» Nua che quella cunzina vegn praticada, san biars conflicts vegnir sligiai a moda discreta. Sche quei gida buc, lu fa ei senn da trer neutier aunc autras persunas. Quei ei denton aunc adina buca lavau resti tschuff ella publicitad. Pér sche quei ha negin effect sa la cuminonza, pia la publicitad vegnir orientada, damai ch’igl ei lu savens era enzatgei pesont che sa ver consequenzas per la communitad.
Ei dat aunc in pass, il davos. El di: sch’enzatgi resta – malgrad tut agid – sin sia via, lu sto quella persuna era purtar las consequenzas. Quella persuna sa vegnir exclaussa.
Quels pass ch’igl evangeli muossa a nus, ein signai da respect ed han da far cun la carezia proximala.
Mt 18,15–20
15Sche tiu frar fallescha, va ed admonescha el, ti persuls cun el. Sch’el teidla tei, has ti gudignau tiu frar. 16Sch’el teidla buca tei, pren cun tei aunc in ni dus auters, per che mintga caussa seigi francada entras il plaid da duas ni treis perdetgas. 17Sch’el teidla era buca quels, di alla cuminonza. Teidla el era buca la cuminonza, lu seigi el per tei sco in pagaun e publican.
18En verdad, jeu ditgel a vus: Tut quei che vus ligeis sin tiara, seigi era ligiau en tschiel, e tut quei che vus sligeis sin tiara, seigi era sligiau en tschiel.
19Plinavon ditgel jeu a vus: Sche dus da vus sin tiara rogan perinamein per enzatgei, emporta nuota tgei, vegn ei dau ad els da miu Bab en tschiel. 20Pertgei nua che dus ni treis ein radunai en miu num, leu sun jeu en lur miez!
